İtaliyanın Venesiya şəhərində “Veneto night” tədbiri çərçivəsində “Azərbaycan dilinə giriş” dərsinin təqdimatı baş tutub.
“Təhsil365” xəbər verir ki, tədbirdə ölkəmizin İtaliyadakı səfirliyinin nümayəndələri də iştirak ediblər. Təqdimat çərçivəsində “Ca’ Foscari” Universitetinin prorektoru Antonio Markomini, Azərbaycan dilini tədris edən professor Elizabetta Raqanin və onun köməkçisi Lalə Şirinova ilə görüş keçirilib.
Görüşdə Azərbaycan və İtaliya arasında əlaqələr, xüsusilə təhsil sahəsində əməkdaşlıq, ölkəmizdə təhsil sistemində aparılan islahatlar, İtaliya-Azərbaycan Universiteti layihəsi və ali təhsil müəssisələrinin davamlı tərəfdaşlığı məsələləri müzakirə olunub.
Prorektor Antonio Markomini “Ca’ Foscari” Universitetinin Azərbaycanla uzunmüddətli əməkdaşlıq əlaqələrinə malik olduğunu qeyd edib. O, hazırda universitetin Azərbaycan Dillər Universiteti və ADA Universiteti də daxil olmaqla bir neçə ali təhsil müəssisəsi ilə əməkdaşlıq etdiyini bildirib.
Professor Elizabetta Raqanin isə daha əvvəl Berlin Universitetində türkologiya üzrə professor kimi fəaliyyət göstərdiyini və Azərbaycan dilçiliyinin onun elmi maraq dairəsinin əsas istiqamətlərindən biri olduğunu vurğulayıb. O, Venesiyaya gəlməsinin əsas məqsədlərindən birinin də Azərbaycan dilçiliyi üzrə tədqiqat və tədris fəaliyyətini davam etdirmək olduğunu qeyd edib.
Qeyd edək ki, 1868-ci ildə təsis edilmiş “Ca’ Foscari” Universiteti İtaliyanın ən qədim və nüfuzlu ali təhsil müəssisələrindən biridir. Universitetin Asiya və Afrika Araşdırmaları Departamenti çərçivəsində bir sıra Şərq və Qafqaz dilləri, o cümlədən Azərbaycan dili tədris olunur.