16 oktyabr tarixində Azərbaycan Respublikasının İdman və Gənclər Nazirliyinin təşkilatçılığı ilə Azərbaycan Dövlət İdman Akademiyasının idman zalında “Konstitusiya və Suverenlik ili”nə həsr olunmuş “GİNius tələbə-gənclər kuboku 2025” – “Fibonacci” intellektual-əyləncəli oyun-yarışı keçirilib.
“Tehsil365” xəbər verir ki, yarışda ali və orta ixtisas təhsili müəssisələrinin komandaları arasında gərgin və maraqlı mübarizə şəraitində keçən bilik mübarizəsində Azərbaycan Dövlət Neft və Sənaye Universitetinin nəzdində Bakı Neft-Energetika Kollecinin “BNEK-1” komandası da iştirak edib.
Tədbirin məqsədi gənclər arasında intellektual düşüncə tərzini inkişaf etdirmək, komanda ruhunu gücləndirmək və Konstitusiyamızın əhəmiyyətinə diqqət yönəltmək olub.
Yarış zamanı iştirakçılar məntiqi düşüncə, biliyə əsaslanan suallar və komanda strategiyası üzrə bacarıqlarını nümayiş etdiriblər.
“BNEK-1” komandası öz fəallığı və hazırlığı ilə seçilərək kolleci layiqincə təmsil edib.
Bu cür layihələr gənclərin intellektual potensialının artırılmasına, eləcə də vətənpərvərlik və komanda əməkdaşlığı dəyərlərinin möhkəmlənməsinə mühüm töhfə verir.