F.Köçərli adına Respublika Uşaq Kitabxanasında tanınmış uşaq yazıçısı Gülzar İbrahimova və 1 nömrəli Ümumi Təyinatlı İnternat Tipli Ümumtəhsil Məktəbinin şagirdlərinin iştirakı ilə ədəbi görüş keçirilib.
‘‘Tehsil365’’ bildirir ki, bu barədə kitabxanadan məlumat verilib.
Bildirilib ki, tədbirdə Gülzar İbrahimovanın uşaq ədəbiyyatına verdiyi töhfələri diqqətə çatdırılıb və müəllifin kitabxana fondunda yer alan əsərləri barədə qısa təqdimat verilib.
Daha sonra yazıçı uşaqlar üçün qələmə aldığı ədəbi nümunələrini təqdim edib, onların məzmununun tərbiyəvi əhəmiyyəti ilə bağlı fikirlərini bölüşüb.
Görüş zamanı şagirdlər müəllifin “Su pərisi və balıqçı”, “Sirus və Virusun macəraları”, “Qızıl balığın arzusu” kimi əsərləri ilə tanış olub, bu əsərlər əsasında sual-cavab formatında müzakirələr aparıblar. Yazıçı şagirdlərin verdiyi sualları cavablandırıb və qələmə aldığı əsərlərinin mövzusu barədə ətraflı məlumat verib.
Tədbirin davamında kitabxana əməkdaşı uşaqlara müxtəlif ədəbiyyat nümunələri təqdim edib, onların maraqlarına uyğun kitabların seçilməsi və oxu vərdişlərinin inkişafı tövsiyələr verib.
Tədbirin məqsədi uşaqların ədəbiyyata marağını artırmaq, mütaliə vərdişlərini formalaşdırmaq və yaradıcı düşüncə bacarıqlarının inkişafına dəstək olmaqdır.