“Musiqi təhsili uşaqların həm intellektual, həm emosional, həm də sosial inkişafında çox mühüm rol oynayır.”
Mövzuyla bağlı “Tehsil365“ə Aytən Oqtayqızı açıqlama verib
“Əvvəla, musiqi uşaqlarda düşünmə, diqqət, yaddaş və yaradıcılıq qabiliyyətlərini gücləndirir. Alət çalmağı və ya notları oxumağı öyrənərkən uşaq həm zehni, həm də motorika bacarıqlarını eyni anda işlədir. Bu, beyin fəaliyyətini aktivləşdirir və ümumi öyrənmə qabiliyyətinə müsbət təsir göstərir.”
Aytən Oqtayqızı bildirib ki,ikincisi, musiqi ilə məşğul olan uşaqlar daha emosional sabit və empatik olurlar. Musiqi onlara hisslərini ifadə etməyi, dinləməyi və paylaşmağı öyrədir. Ansambl və orkestrdə birgə ifa isə əməkdaşlıq, məsuliyyət və intizam hissini formalaşdırır.
Üçüncüsü, musiqi təhsili uşaqlarda estetik zövqü və incə duyumları formalaşdırır. Uşaqlar klassik və milli musiqi nümunələrini dinlədikcə, onların zövqləri inkişaf edir, gözəllik duyğusu və sənətə münasibətləri dəyişir. Onlar mütləq cəmiyyətdə fərqlənirlər.
Həmçinin Aytən Oqtayqızı qeyd edib ki,ən önəmlisi — bu uşaqlar gələcəkdə peşəkar musiqiçi olmasalar belə, musiqi ilə təmasda olduqları üçün daha yüksək mədəni zövqə malik, seçilən şəxsiyyətlərə çevrilirlər. Onlar həyatda gözəlliyi daha dərindən dərk edir, hər sahədə yaradıcı və duyğulu yanaşma nümayiş etdirirlər.