Müasir dövrdə iqtisadi inkişafın əsas göstəricilərindən biri əmək bazarının peşəkar kadrlarla təmin olunmasıdır. Bu baxımdan peşə təhsilinin rolu getdikcə daha çox ön plana çıxır.
Təhsil eksperti Rəşad Həsənov “Tehsil365”ə açıqlamasımda bildirib ki, bu gün ölkəmizdə peşə təhsilinin yenidən formalaşdırılması istiqamətində mühüm islahatlar həyata keçirilir:
“Əvvəllər peşə məktəblərinə münasibət o qədər də müsbət deyildi. Amma indi bu istiqamətə dövlət səviyyəsində xüsusi diqqət göstərilir. Çünki iqtisadiyyatın dayanıqlı inkişafı üçün praktik bacarıqlara malik gənclərin yetişməsi vacibdir.”
Ekspertin fikrincə, peşə təhsili gənclərin yalnız iş tapmaq deyil, həm də öz biznesini qurmaq imkanlarını genişləndirir.
“Bu təhsil forması gəncləri real əmək bazarına hazırlayır. Uşaqlar məktəbdə öyrəndiklərini praktik olaraq tətbiq edir və nəticədə daha erkən yaşdan əmək vərdişləri qazanırlar. Belə məzunlar iş həyatına daha tez uyğunlaşır.”
Rəşad Həsənov qeyd edib ki, bir çox inkişaf etmiş ölkələrdə peşə təhsili ali təhsillə eyni səviyyədə qiymətləndirilir.
“Cəmiyyətimizdə də bu yanaşma formalaşmalıdır. Hər kəs universitet diplomu əldə etməyə çalışmamalıdır. Bəzən yaxşı usta, mühəndis və ya texniki mütəxəssis olmaq daha real və gəlirli yoldur. Bu, iqtisadi sabitlik üçün də önəmlidir.”
Ekspert əlavə edib ki, peşə təhsil müəssisələrində əmək bazarına uyğun ixtisasların sayının artırılması və şirkətlərlə əməkdaşlığın genişləndirilməsi vacibdir.
“Tədris proqramları müasir tələblərə uyğun yenilənməlidir. Gənclər yalnız nəzəri deyil, həm də real istehsalat təcrübəsi qazanmalıdırlar. Bunun üçün özəl sektorla birgə tədris layihələri yaradılmalıdır.”
Sonda Rəşad Həsənov vurğulayıb ki, peşə təhsili sadəcə bir tədris forması deyil, həm də ölkənin sosial-iqtisadi inkişafında mühüm dayaq nöqtəsidir:
“Biliklə bacarığın birləşdiyi yerdə həqiqi peşəkarlıq yaranır. Peşə təhsili bu balansı yaradır və gənclərə gələcəyin real fürsətlərini təqdim edir.”