“Bu dünyaya müəllim olmaq üçün gəlmişəm”.
Bu fikirləri “Tehsil365“ə müsahibəsində Oğuz rayon Qarabaldır tam orta məktəbinin azərbaycan dili və ədəbiyyat müəllimi Könül Ağakişiyeva deyib. O müəllimliyi ən şərəfli və üstün peşə tutub.
Bu peşə sizin üçün nə ifadə edir?
“Bu peşənin sahibi olduğum üçün çox qürurluyam.Müəllim elə bir varlıqdır ki, o,şəxsiyyət yetişdirir, insanın həyatında unudulmaz izlər qoyur.Onun taleyində,gələcəyinin necə istiqamətlənməsində böyük rol oynayır. Müəllim bu məsuliyyətli işi icra edərkən vicdanlı,dürüst,mərhəmətli olmalıdır ki,şagirdləri də elə şəxsiyyət kimi yetirsinlər”.
Əsl müəllim necə olmalıdır?
“Əsl müəllim şagirdə birinci sevgi dolu olmağı öyrətməlidir.Çünki sevginin açdığı cığır şagirdi daha işıqlı,parlaq,uğurlarla dolu yollara aparır.Hər 45 dəqiqənin sonunda şagirdlər mənə deyirlər ki,müəllimə, dərs necə tez bitdi. Onlar dərs prosesində sıxılmadan,darıxmadan,əylənərək öyrənirlər.Şagird müəllimini sevirsə,ona hörmət edirsə o dərs effektiv olacaq”.
İnsan müəllim kimi doğula bilər?
“Mənə elə gəlir ki,mən müəllim olmaq üçün dünyaya gəlmişəm. Çünki əsl müəllim müəllim kimi doğulur, sonradan sadəcə diplom alır,biliklərini artırır. Müəllimliyə məxsus dəyərlər,keyfiyyətlər isə müəllimin qanında, canında olmalıdır.Dünyanın ən dəyərli peşəsinə sahib olduğum üçün çox şanslıyam”.