“Gələcəyin memarı gənclər, gənclərin ilhamı isə müəllimlərdir,” – deyə Siyəzən Rayon Mikayıl Müşfiq adına 2 nömrəli tam orta məktəbin Azərbaycan dili və ədəbiyyat müəllimi Məlahət Mehdili “Təhsil365”ə müsahibəsində bildirib.
O, fikirlərində bildirib:
“2002-ci ildə Azərbaycan Dövlət Pedaqoji Universitetinin Filologiya fakültəsini bitirmişəm, hazırda isə müəllimlik fəaliyyətimi davam etdirirəm. Peşə fəaliyyətim boyunca bir müəllim olaraq ana dilinin incəliklərini, zənginliyini və tədris etdiyim fənnin dərinliklərini şagirdlərimə aşılamışam. Bunu bu gün Respublikamızın müxtəlif ali məktəblərində təhsil alan tələbələrimin nailiyyətləri, onların minnətdarlıqla dolu xoş geri dönüşləri təsdiqləyir.
Belə bir məsəlimiz var: “Niyyətin hara, mənzilin ora.” Hələ uşaq ikən əlimə qələm alıb sinif jurnalı təşkil etməyim, ora siyahı yazıb müəllimlik etməyim, sən demə, gələcəkdə öz peşəsini sevən bir müəllimə çevriləcəyimə vəsilə olacaqmış.
Bu il müəllim olaraq fəaliyyət göstərməyimin 24 ili tamam olur. Bütün bu illər ərzində müxtəlif mövzularda “Açıq dərslər” təqdim etmiş, şair və yazıçılarımızın yaradıcılıq gecələrini təşkil etmiş, sosial layihələrə qoşulmuş, II Qarabağ müharibəsində əldə etdiyimiz Qələbənin şərəfinə rayon səviyyəsində “Zəfər Günü” adlı böyük tədbirin təşkilatçısı və aparıcısı olmuşam. Şagirdlərimin ədəbiyyata, incəsənətə, aktyorluğa olan gizli həvəslərini aşkara çıxarmaqda hər zaman həvəsli olmuşam. Bu gün onların uğurlarına sevinirəm, özümlə və onlarla fəxr edirəm.
Boş vaxt keçirməyi sevməyən və özünü inkişaf etdirməyə meyilli biri, cəmiyyətdə bir çox insandan daha üstün olur – deyərək bu gün də özünüinkişafla və gələcəyə yönəlik planlarla bağlı hazırlıqlar görməkdəyəm. Mənə görə, əsl müəllim öz vəzifəsinin məsuliyyətini, çətinliyini və müqəddəsliyini dərk etməli, gələcək nəslin rifahı naminə heç bir çətinlikdən qorxmamalı, fədakarlığı öz stimuluna çevirməlidir.
Bu gün mən, əsl müəllim kimi, dövlətimin, cəmiyyətin və dünyanın tələblərini əsas götürərək, müasir məktəblinin maraqlarını yüksək səviyyədə təşkil etməyi hədəfləyirəm.
Unutmayaq: “Şagird hər mənada müəlliminə inanmalıdır.” Müəllim isə qarşısındakı vəzifənin məsuliyyətini anlamalı, bunun üçün səylə çalışmalı və cəmiyyətin nümunə götürə biləcəyi bir şəxsiyyət olmalıdır.
Bu gün mən, həyatıma birbaşa və ya dolayısı ilə toxunmuş, savadını və əməyini mənə sərf etmiş, üzərimdə haqqı olan bütün müəllimlərimə minnətdaram.