Xaricdə təhsil prosesi yalnız başqa bir ölkədə oxumaq deyil, həm də gəncin gələcək karyerasını və həyat yolunu müəyyən edən mühüm bir seçim mərhələsidir.
Mövzu haqqında “Tehsil365”ə təhsil eksperti İlkin Məmmədkərimov açıqlama verib. O qeyd edib ki, xaricdə təhsil almaq istəyən gənclər üçün ixtisas seçimi çox mühüm və məsuliyyətli bir mərhələdir. Bu proses adətən fərdi şəkildə aparılır və abituriyentin maraqları, bacarıqları, eləcə də gələcək planları nəzərə alınır. Xaricdə təhsil şirkətləri bu mərhələdə mühüm rol oynayır və abituriyentə doğru istiqamət göstərməyə kömək edirlər.
“İxtisas seçimi zamanı xaricdə təhsil şirkətləri əvvəlcə abituriyentlə fərdi şəkildə işləyir. Azərbaycanda imtahandan kəsilən və ya hələ qərarsız olan tələbələrin hansı sahələrə marağı olduğunu müəyyənləşdirmək üçün onlardan kiçik bir imtahan götürülür. Bu imtahan sərbəst suallar əsasında aparılır və nəticələr əsasında hər bir gəncin hansı sahəyə daha çox meyilli olduğu müəyyən edilir.”
O bildirib ki, İmtahan nəticələri və fərdi maraqlar nəzərə alındıqdan sonra şirkət abituriyentlə birlikdə ixtisas və universitet seçimini həyata keçirir. Yerləşdirmə prosesi zamanı həm universitet, həm də ölkə abituriyentin istəyinə uyğun şəkildə müəyyən olunur. Bu prosesdə əsas məqsəd tələbənin potensialına uyğun olan ixtisası tapmaqdır.
“İxtisas seçimi zamanı konkret bir sahəyə tələbatı müəyyən etmək bəzən çətin olur, çünki bu, hər bir şəxsin marağına və bacarığına bağlıdır. Bununla belə, ixtisas seçərkən iş bazarının tələbatı, qlobal imkanlar, proqramın keyfiyyəti və universitetin nüfuzu da nəzərə alınmalıdır. Güclü analitik bacarıqları olan gənclər üçün mühəndislik və kompüter elmləri, yaradıcılıq və sosial bacarıqları olanlar üçün isə incəsənət, media və psixologiya kimi sahələr daha uyğundur.”
“Bu gün dünyada ən çox tələbat görən ixtisaslar arasında mühəndislik, kompüter elmləri, biznes və idarəetmə, tibb və sosial elmlər yer alır. Xüsusilə süni intellekt, maşın öyrənməsi və kibertəhlükəsizlik kimi müasir sahələr ön plana çıxır.”
O qeyd edib ki, xaricdə təhsil şirkətləri ilə işləyərkən etibarlılığa diqqət etmək vacibdir. Bazarda uzun illər fəaliyyət göstərən “Beynəlxalq Təhsil Mərkəzi” və “Sənəd Xaricdə Təhsil Mərkəzi” kimi şirkətlər etibarlı hesab olunur. Bununla yanaşı, bəzi fırıldaqçı şirkətlərin də mövcud olduğu qeyd edilir, buna görə seçim zamanı araşdırma aparmaq lazımdır.
“Bəzi ölkələrin universitetlərinə (məsələn, Türkiyə, Rusiya, Ukrayna, eləcə də bəzi Avropa və Amerika universitetlərinə) attestatla, imtahansız qəbul mümkündür. Lakin bu zaman dil biliyini təsdiq edən sertifikatlar (IELTS, TOEFL və ya Duolingo) tələb oluna bilər. Bəzi universitetlərdə isə əlavə olaraq GRE, GMAT və SAT kimi beynəlxalq imtahan nəticələri, pasport, sağlamlıq arayışı və müsahibə mərhələsi də tələb olunur.”
Nəticə etibarilə, xaricdə təhsil almaq istəyən hər bir gənc üçün düzgün ixtisas və universitet seçimi gələcək karyerasına təsir edən ən vacib addımlardan biridir. Bu qərar verilməzdən öncə həm şəxsi maraqlar, həm də beynəlxalq təhsil imkanları diqqətlə nəzərdən keçirilməlidir.