Gəncə Dövlət Universitetində Azərbaycan Milli Elmlər Akademiyasının (AMEA) 80 illik yubileyinə həsr olunan dəyirmi masa təşkil olunub.
“Tehsil365” AZƏRTAC-a istinadla xəbər verir ki, tədbirdə humanitar məsələlər üzrə prorektor Gülsüm Fətəliyeva Prezident İlham Əliyevin “AMEA-nın 80 illiyinin qeyd edilməsi haqqında” Sərəncamının elmə, ziyalılara və yeni nəsil alimlərə göstərilən yüksək diqqətin təzahürü olduğunu bildirib. O, AMEA-nın 80 il ərzində milli elmə və kadr hazırlığına mühüm töhfə verdiyini vurğulayıb. Həmçinin Ulu Öndər Heydər Əliyevin Akademiyanın inkişafında xüsusi rolu qeyd edilib və onun müəyyən etdiyi elm siyasətinin bu gün Prezident İlham Əliyev tərəfindən uğurla davam etdirildiyi bildirilib.
Dəyirmi masada Milli Məclisin deputatı, elm və innovasiyalar üzrə prorektor Pərvin Kərimzadə, AMEA-nın müxbir üzvü Vaqif Novruzov, Kimya və biologiya fakültəsinin dekanı İsfəndiyar Alverdiyev, kafedra müdirləri Sevda Əhmədova və Vəfa Məmmədova müxtəlif mövzularda çıxış ediblər.
Çıxışlarda AMEA-nın Azərbaycan elminin inkişafında, milli intellektual potensialın formalaşmasında və elmi ənənələrin qorunmasında mühüm rol oynadığı vurğulanıb. Akademiyanın bu gün də öz tarixi missiyasını uğurla davam etdirdiyi qeyd olunub.