Oktyabrın 24-də Prezident Kitabxanasında ziyalı və incəsənət xadimləri ilə görüş keçirilib. Görüşdə tanınmış fotojurnalist Reza Deqati, Azərbaycanın görkəmli bəstəkarı, Xalq artisti, professor Siyavuş Kərimi, Akademik Opera və Balet Teatrının direktor müavini, Əməkdar artist Ramil Qasımov və “Bizi birləşdirən mədəniyyət” İctimai Birliyinin sədr müavini Riad Quliyev iştirak ediblər.
“Tehsil365” “AZƏRTAC“ istinadla xəbər verib.
Bildirilib ki, Prezident Kitabxanasının direktoru, professor Afət Abbasova qonaqları kitabxananın fəaliyyəti, zəngin fondları və həyata keçirilən layihələrlə tanış edib. O, Prezident Kitabxanasının elm, mədəniyyət və incəsənət sahələrində əməkdaşlığa xüsusi önəm verdiyini, bu istiqamətdə yeni yaradıcılıq təşəbbüslərinin irəli sürülməsinin prioritet istiqamətlərdən biri olduğunu vurğulayıb.
Görüş zamanı mədəniyyət sahəsində birgə əməkdaşlıq, yeni layihələrin reallaşdırılması imkanları müzakirə olunub. Fotojurnalistika, musiqi və sərgi fəaliyyəti sahələrində qarşılıqlı təşəbbüslərin həyata keçirilməsi ilə bağlı fikir mübadiləsi aparılıb.
Yaradıcı atmosferdə keçən görüş zamanı Əməkdar artist Ramil Qasımov və Xalq artisti, professor Siyavuş Kərimi Ulu Öndər Heydər Əliyevin ən çox sevdiyi mahnılardan biri olan Cahangir Cahangirovun “Alagöz” (sözlər: Zeynal Cabbarzadə) əsərini, eləcə də bəstəkar Siyavuş Kəriminin yeni bəstələdiyi “Sən yanımda ol” (sözlər: Şahnaz Haşımova) mahnısını ifa ediblər.