Gənc yazıçı Pərviz Rzalı “Gecə Ovçusu” əsəri ilə bağlı oxucu rəyləri, mesajı və yazı prosesində qarşılaşdığı çətinliklər haqqında açıqlamalar verib.
“Tehsil365” xəbər verir ki, oxuculardan gələn maraqlı rəylər var.
Pərviz Rzalı bildirib ki, yazdığı əsərə oxuculardan əsasən müsbət rəylər alıb. Onlardan biri isə xüsusilə yadda qalıb: “Wattpad-da hekayəni paylaşdığım vaxt oxuculardan biri bu əsərin filmə çevrilə biləcəyini yazmışdı. Bu, mənim üçün böyük motivasiya oldu.”
O əlavə edib ki, əvvəlcə yazdığı mətnlərdə bədiilik zəif idi, lakin oxucu rəylərini nəzərə alaraq bütün hekayəni yenidən işləyib və bədii dilə daha çox önəm verməyə başlayıb.
Əsərin əsas mesajı
Yazıçının sözlərinə görə, “Gecə Ovçusu” əsərinin verdiyi əsas mesaj budur ki, qaranlıq və qanunsuz yolların sonu məhvdir. Əsərdəki mafiya başçısı Edvina obrazı bunun bariz nümunəsidir. Hekayə həmçinin müharibədən sonra insanların həyatla mübarizəsi, onların daxili çarpışmaları və sosial reallıqları üzə çıxarır.
Əsər iki əsas istiqaməti birləşdirir:
- Detektiv janrı – cinayət, təqib və sirr dolu hadisələr
- Müharibə sonrası həyat – travmalar, yenidən başlama cəhdi və insan ruhunun dirənişi
Ən çətin hissələr nələr idi?
Rzalı bildirib ki, əsərdəki xarici ölkələrin təsviri onun üçün ən çətin hissə olub:
"Çünki hekayədə adı keçən ölkələrin heç birində olmamışdım. Məsələn, London, Belfast və İtaliyanın müxtəlif şəhər və kəndlərini təsvir etmək üçün araşdırmalar apardım. Tarixi və coğrafi məlumatlar topladım, real məkanları oxucunun təsəvvüründə canlandırmaq üçün əlimdən gələni etdim."
O, bütün bu detalların hekayəyə reallıq və dərinlik qatdığını vurğulayır.
Pərviz Rzalı hazırda “Gecə Ovçusu: Küllərdən Doğulan” adlı davam kitabı üzərində çalışır və bu əsərin ilk hissəni daha da zənginləşdirəcəyini bildirir. Oxucular yeni hissədə daha çox emosional və dərin psixoloji qatlar gözləyə bilərlər.