“İngilis dilini öyrənmək sadəcə bir fənn deyil, bu, insanın dünyaya açılan pəncərəsidir” — bu fikirləri Siyəzən Uşaq-Gənclər İnkişaf Mərkəzinin İngilis dili danışıq qrupunun müəllimi və rəhbəri Mehriban İskəndərova bildirib.
Mövzu barəsində müəllim Mehriban İskəndərova “Tehsil365”ə verdiyi açıqlamasında bildirib ki, “İngilis dili sayəsində biz təkcə yeni sözlər və qrammatika öyrənmirik, həm də fərqli mədəniyyətləri, düşüncə tərzlərini və həyat baxışlarını tanıyırıq.
Müasir dövrdə elm, texnologiya, təhsil və hətta gündəlik həyatın bir çox sahələri ingilis dili ilə sıx bağlıdır. Şagirdlərimiz bu dili bildikdə, dünyadakı yenilikləri izləyə bilir, sərhədlərdən kənara çıxıb öz bilik və bacarıqlarını qlobal səviyyədə nümayiş etdirə bilirlər.
Mən müəllim kimi inanıram ki, ingilis dili öyrənmək uşaqlarda həm özünəinamı artırır, həm də onlarda dünyaya maraq oyadır. Ona görə də düşünürəm ki, ingilis dili təkcə dərs deyil — o, gələcəyə aparan bir körpüdür.”