Azərbaycan Respublikası Prezidentinin Sərəncamına əsasən, Birinci Türkoloji Qurultayın 100 illiyinin qeyd edilməsi ilə bağlı hazırlıqlara başlanılıb.
“Tehsil365” Mədəniyyət Nazirliyinin məlumatına əsasən xəbər verir ki, bu məqsədlə oktyabrın 31-də Mədəniyyət Nazirliyində nazir Adil Kərimlinin iştirakı ilə Elm və Təhsil Nazirliyi və Azərbaycan Milli Elmlər Akademiyasından dəvət olunmuş nümayəndələrlə birgə işçi qrupun ilk iclası keçirilib.
İclasda Prezidentin Sərəncamından irəli gələn məsələlər müzakirə olunub.
Nəzərdə tutulan tədbirlərin konsepsiyası, təşkilati məsələlər, eləcə də qurultayın tarixi-mədəni əhəmiyyəti vurğulanıb.
Qeyd edilib ki, tarixi Qurultayın 100 illik yubileyi Türk dünyasının elmi-mədəni əlaqələrinin inkişafına mühüm töhfə verəcək. İclasda hazırlıq prosesinin növbəti mərhələləri üzrə konkret tapşırıqlar verilib.