"Tehsil365" İnformasiya Agentliyinin layihəsi olan “Şəhidin səsi” proqramının növbəti buraxılışı qəhrəman şəhid Vəlizadə Kamran Əkpər oğluna həsr olunub.
“Tehsil365" xəbər verir ki, veriliş bu gün, 3 noyabr saat 18:00-da efirə gedəcək. Buraxılışın aparıcısı Rəşidə Nəbizadədir.
Kamran Vəlizadə 14 sentyabr 1996-cı ildə Lənkəran rayonunun Nərimanabad qəsəbəsində anadan olub. 2014-cü ildə Nərimanabad kənd Elman Məmmədov adına tam orta məktəbi bitirərək, elə həmin il Azərbaycan Dövlət Neft və Sənaye Universitetinə qəbul olunub. 2018-ci ildə istilik energetikası mühəndisliyi ixtisası üzrə ali təhsilini başa vurub.
2018–2019-cu illərdə Milli Orduda həqiqi hərbi xidmətdə olub. 2020-ci ilin sentyabrında ixtisası üzrə “AzərEnerji” ASC-də işə qəbul olunsa da, 28 sentyabr 2020-ci ildə səfərbərlik elan edildikdən sonra yenidən hərbi xidmətə çağırılıb.
Kamran Vəlizadə Füzuli və Qubadlı rayonlarının azad olunması uğrunda gedən döyüşlərdə qəhrəmanlıqla iştirak edib. O, 23 oktyabr 2020-ci ildə Qubadlı döyüşləri zamanı şəhidlik zirvəsinə ucalıb və 11 noyabrda doğma Nərimanabad qəsəbəsində torpağa tapşırılıb.
Subay olan şəhidimiz göstərdiyi igidliyə görə Azərbaycan Respublikası Prezidentinin müvafiq sərəncamları ilə “Vətən uğrunda”, “Qubadlının azad olunmasına görə” və “Cəbrayılın azad olunmasına görə” medalları ilə ölümündən sonra təltif edilib.
Şəhidin xatirəsinin əbədiləşdirilməsi məqsədilə Lənkəran rayonunun Nərimanabad qəsəbəsində küçələrdən birinə onun adı verilib. Həmçinin Azərbaycan Dövlət Neft və Sənaye Universitetində adına auditoriya otağı, Bakı şəhəri 167 nömrəli məktəbdə isə sinif otağı yaradılıb. Qeyd edək ki, Balıqçılar kənd tam orta məktəbinə də şəhidin adının verilməsi təklif olunub, lakin hələlik rəsmi təsdiqini tapmayıb.
Kamran Vəlizadə — Vətən uğrunda canından keçən, qəhrəman övladlarımızdan biridir.