Bu gün, 3 noyabr, İslam tarixinin ən ədalətli rəhbərlərindən biri, Peyğəmbər Məhəmmədin (s.ə.s.) səhabəsi və İslamın ikinci xəlifəsi Ömər bin Xəttabın (r.a.) şəhid olduğu gündür.
"Tehsil365"in məlumatına görə, Ömər bin Xəttab 584-cü ildə Məkkə şəhərində dünyaya gəlib. Əvvəlcə İslama qarşı olan qəbilə başçılarından biri olsa da, Qurani-Kərimin təsirindən sonra haqq dini qəbul edib və İslamın yayılmasında mühüm rol oynayıb. Onun İslama gəlişi müsəlmanların açıq şəkildə ibadət etməsinə şərait yaradıb.
Peyğəmbər Məhəmmədin (s.ə.s.) vəfatından sonra ilk xəlifə Əbu Bəkr əs-Siddiqin (r.a.) dövründə mühüm işlərdə iştirak edən Ömər bin Xəttab, 634-cü ildə onun vəfatından sonra İslamın ikinci xəlifəsi seçilib.
Onun rəhbərliyi dövründə İslam dövləti böyük coğrafiyaya yayılıb — Misir, İran, Suriya, Fələstin və İraq torpaqları müsəlmanların nəzarətinə keçib. Ömər bin Xəttab dövlət idarəçiliyində bir sıra islahatlar həyata keçirib: hicri təqvimi tətbiq olunub, beytül-mal (dövlət xəzinəsi) yaradılıb, ədalətli məhkəmə sistemi formalaşdırılıb.
Sadə və təvazökar həyat tərzi ilə seçilən xəlifə ədalət prinsipinə sadiqliyi ilə xalqın sevgisini qazanmışdı. Onun məşhur kəlamlarından biri belədir:
“Ədalət olmasa, dövlət də ayaqda qala bilməz.”
Ömər bin Xəttab hicri 23-cü ilin Zülhiccə ayının 26-da (miladi 3 noyabr 644) sübh namazı zamanı Əbu Lü’lü Firuzi adlı şəxs tərəfindən bıçaqlanaraq ağır yaralanıb və bir neçə gün sonra şəhid olub.
O, Peyğəmbər Məhəmmədin (s.ə.s.) və Əbu Bəkr əs-Siddiqin (r.a.) yanında — Mədinədəki Peyğəmbər məscidində dəfn olunub.