Davranış problemlərinin qarşısını almaq üçün psixoloq ilk növbədə profilaktik və sistemli yanaşmadan istifadə etməlidir. Bunun üçün bir neçə əsas strategiya mövcuddur.
Bu sözləri “Tehsil365”ə açıqlamasında psixoloq Nizami Orucov bildirib.O, bildirib ki:
Birincisi, emosional tənzimləmə və stresslə mübarizə bacarıqlarının inkişaf etdirilməsi. Psixoloq fərdlərə duyğularını tanımağı, ifadə etməyi və idarə etməyi öyrədir. Bu bacarıq düzgün formalaşdıqda, davranış reaksiyaları da daha sabit olur.
İkincisi, müsbət ünsiyyət və sosial bacarıqların gücləndirilməsi. Psixoloq insanlara empati qurmaq, qarşı tərəfi dinləmək və qarşıdurmaları zorakılıqsız həll etmək kimi bacarıqları aşılamaqla, aqressiv və impulsiv davranışların qarşısını alır.
Üçüncüsü, özünəinamın və məsuliyyət hissinin artırılmasıdır. İnsan özünü dəyərli və məsuliyyət daşıdığını hiss etdikdə, davranış pozuntusu göstərmə ehtimalı azalır. Psixoloq bu məqsədlə motivasiyaedici söhbətlər, fərdi inkişaf planları və psixoloji testlərdən yararlana bilər.
Dördüncüsü, davamlı müşahidə və dəstək sistemi qurmaqdır. Psixoloq davranışdakı dəyişiklikləri izləməli, risk faktorlarını vaxtında müəyyənləşdirməli və zərurət olduqda fərdi və ya qrup terapiyaları tətbiq etməlidir.
Yəni əsas məsələ davranış problemlərinin qarşısını almaq üçün psixoloqun qarşısındakı insana cəza yönümlü deyil, anlayış və dəstək yönümlü yanaşmasıdır.