Yaponiyada hökumət partiyaları- Liberal Demokrat Partiyası (LDP), Japan Innovation Party (Nippon Ishin) və Komeito- 2026-cı maliyyə ilindən etibarən lisey təhsilini daha əlçatan etmək məqsədilə yeni maliyyə dəstək proqramını həyata keçirmək barədə razılığa gəliblər.
“Tehsil365” xarici mediaya istinadən xəbər verir ki, bu təşəbbüs çərçivəsində hökumət lisey təhsili üzrə maliyyə yükünü qismən azaltmağı, xüsusilə özəl məktəblərdə oxuyan şagirdlərə yönəlik subsidiya məbləğini artırmağı planlaşdırır. Yeni qərara əsasən, tam-vaxt (full-time) özəl lisey tələbələri üçün dövlət subsidiyasının yuxarı həddi mövcud 396 min yen səviyyəsindən 457 min yenə qaldırılacaq, uzaqdan (distans) təhsil alan şagirdlər üçün isə bu limit təxminən 337 min yen müəyyən ediləcək.
Hökumət nümayəndələri bildiriblər ki, bu proqramın əsas məqsədi təhsil xərclərini azaltmaq, valideynlərin və şagirdlərin üzərindəki iqtisadi yükü yüngülləşdirmək və gənclərə daha çox təhsil seçimi imkanı yaratmaqdır. Bununla yanaşı, proqramın tətbiq dairəsi məhduddur: “müvəqqəti yaşayış statusu” ilə ölkədə olan xarici tələbələr və xarici məktəblərdə təhsil alanlar bu dəstəkdən yararlana bilməyəcəklər.
Yeni subsidiyaların tətbiqi Yaponiyada sosial bərabərliyi artırmaq, gənclərin təhsil almaq imkanlarını genişləndirmək və gələcəkdə əmək bazarının tələblərinə uyğun bilikli kadrların hazırlanmasına töhfə vermək məqsədi daşıyır. Hökumət rəsmiləri qeyd edirlər ki, bu addım həm sosial, həm də iqtisadi baxımdan ölkənin inkişafına müsbət təsir göstərəcək, ailələrin təhsil xərclərinə olan narahatlığını bir qədər azaldacaq.