Noyabrın 4-də Azərbaycan Dillər Universitetində (ADU) Braziliyanın Espirito Santo Universitetinin professoru Santinho de Souza ilə görüş keçirilib. Görüşdə ADU-nun Beynəlxalq əlaqələr üzrə prorektoru Dr. Jalə Qəribova, universitetin müəllimi Anar Rəhimov, həmçinin Beynəlxalq şöbənin mütəxəssisləri Aidə Quluzadə və İbrahim Rzayev iştirak ediblər.
“Tehsil365” xəbər verir ki, görüş zamanı iki ali təhsil müəssisəsi arasında tələbə və müəllim mübadiləsi, ikili diplom layihəsi, eləcə də elmi əməkdaşlıq imkanları müzakirə olunub.
Prof. Santinho de Souza ADU tələbələrinin bir semestr müddətinə Espirito Santo Universitetində təhsil ala biləcəyini qeyd edib. Onun sözlərinə görə, bu proqram çərçivəsində bir yer magistratura, iki yer bakalavr və bir yer müəllimlər üçün nəzərdə tutulub. Tələbələr ilkin mərhələdə öz tədris planlarını təqdim etməli, uyğun hesab olunduğu təqdirdə təhsil almaq imkanı əldə edəcəklər.
Dil biliyi ilə bağlı məsələyə toxunan professor bildirib ki, portuqal dilini bilmək arzu olunandır, lakin bilməyən tələbələr üçün universitet tərəfindən bir aylıq intensiv dil kursu təşkil edilə bilər.
ADU-nun prorektoru Dos. Jalə Qəribova əməkdaşlığın qarşılıqlı əsasda həyata keçirilməsinin vacibliyini vurğulayaraq, Espirito Santo Universitetinin müəllimlərinin də ADU-da dərs deməsi və birgə ikili diplom layihəsinin həyata keçirilməsini təklif edib. Prof. de Souza bu təklifi müsbət qarşılayaraq, məsələ ilə bağlı detallı müzakirələrin aparılacağını qeyd edib.
Görüş zamanı, həmçinin hər iki universitetin müəllimlərinin birgə elmi məqalələr yazması və tədqiqat sahəsində əməkdaşlıq perspektivləri müzakirə olunub.
Görüşün sonunda tərəflər arasında gələcək əməkdaşlıq istiqamətləri üzrə əməli addımların atılması barədə razılıq əldə olunub.