İmtahan stresi çox yayılmış bir haldır və əslində bu, tamamilə normaldır. İnsan vacib bir mərhələyə hazırlaşanda, bədən və beyin təbii olaraq “gözləntiyə” girir. Amma problem o vaxt yaranır ki, bu gərginlik idarə olunmur və insanın diqqətini, motivasiyasını azaldır.
Bu fikirləri “Tehsil365” ə açıqlamasında psixoloq Nizami Orucov bildirmişdir.O,bildirib ki:
Birincisi, planlı hazırlıq stresin əsas düşmənidir. Nəyi nə vaxt oxuyacağını bilmək, beynə “ hər şey nəzarət altındadır ” mesajı verir və narahatlığı azaldır.
İkincisi, dincəlmək də oxumağın bir hissəsidir. Bir çox tələbə düşünür ki, fasilə vermək vaxt itkisinə səbəb olur, amma əksinə, fasilə beyinə məlumatı həzm etməyə kömək edir.
Üçüncüsü, özünü başqaları ilə müqayisə etməmək çox vacibdir. Hər kəsin öyrənmə tərzi və tempi fərqlidir, bir başqasının daha çox bildiyini düşünmək yalnız özünəinamı azaldır.
Dördüncüsü, bədən və nəfəs üzərində nəzarət məsələn, dərin nəfəs alma, yüngül gəzinti və ya hərəkət etmək, beyinə “təhlükə yoxdur” siqnalı verir və sakitləşdirir və ən əsası, imtahanı həyatın son nöqtəsi kimi deyil, bir mərhələ kimi görmək lazımdır. Həyat imtahanlardan ibarətdir, amma heç biri insanın dəyərini müəyyənləşdirmir. Sakit beyin hər zaman daha yaxşı xatırlayır, ona görə də uğur çox vaxt sakit qalmağı bacaranlarda olur.