Virciniya ştatında baş verən sarsıdıcı hadisədən sonra keçmiş ibtidai sinif müəllimi Abigail Zwerner 10 milyon dollarlıq təzminat iddiasını qazanıb.
“Tehsil365” xəbər verir ki, hadisə 6 yanvar 2023-cü ildə Newport News şəhərindəki Richneck İbtidai Məktəbində baş vermişdi. 6 yaşlı bir şagird Zwerneri əlindən və sinəsindən vurmuşdu. Müəllimin və vəkillərinin iddiasına görə, məktəb rəhbərliyi, xüsusilə direktor köməkçisi Ebony Parker, uşağın silah gətirəcəyi ilə bağlı əvvəlcədən xəbərdar edilmiş, lakin bu siqnallara məhəl qoymamışdı.
Məhkəmə 3 kişi və 4 qadından ibarət münsiflər heyətinin qərarı ilə Zwernerin xeyrinə qərar çıxarıb və ona 10 milyon dollar təzminat ödənməsinə qərar verib.
Bu hadisə ABŞ-da məktəblərdə təhlükəsizlik və silah nəzarəti ilə bağlı müzakirələri yenidən gündəmə gətirib.