Bakı Dövlət Universitetində (BDU) Geologiya, Ekologiya və torpaqşünaslıq, Coğrafiya fakültələrinin könüllülərinin birgə təşkilatçılığı ilə “Xəzər dənizinin gələcəyi: elmi yanaşmalar və dayanıqlı idarəetmə” mövzusunda maarifləndirici təlim keçirilib.
“Tehsil365” xəbər verir ki, təlimin məqsədi Xəzər dənizinin hazırkı ekoloji vəziyyəti, iqlim dəyişikliklərinin təsirləri və dənizdə dayanıqlı idarəetmə prinsiplərinə dair maarifləndirmə aparmaq olub.
Geologiya fakültəsinin “BDU könüllüləri” təşkilatının sədri Ülvi Ağaliyev Xəzər dənizinin geoloji quruluşu, neotektonik proseslər, dəniz dibində baş verən dəyişikliklər, eləcə də çökmə süxurların (sedimentlərin) tərkibi və formalaşma şəraiti barədə məlumat verib. Qeyd olunub ki, Xəzər hövzəsində baş verən geoloji və iqlim hadisələrinin qarşılıqlı təsirinin öyrənilməsi regionun ekoloji sabitliyinin qorunması baxımından xüsusi əhəmiyyət kəsb edir.
Tədbirdə Ekologiya və torpaqşünaslıq fakültəsinin Coğrafi ekologiya kafedrasının müəllimi Türkan Məmişova Kür çayının axım həcminin azalmasının Xəzər dənizinə təsirləri barədə danışıb. O, həmçinin Dayanıqlı İnkişaf Məqsədlərinin (DİM) regionun ekoloji idarəetmə strategiyasında roluna toxunub. Türkan Məmişova bildirib ki, BMT-nin DİM prinsiplərinin yerli səviyyədə tətbiqi Xəzərətrafı icmaların rifahına, ekosistemlərin qorunmasına və təbii resurslardan balanslı istifadəyə xidmət etməlidir. Qeyd edilib ki, son illərdə çayların su ehtiyatlarının azalması nəticəsində Xəzərin səviyyəsində dəyişikliklər müşahidə olunur və bu proses dənizin bioloji müxtəlifliyi, su ekosistemləri və sahil bölgələrinin sosial-iqtisadi inkişafına təsir göstərir.
Coğrafiya fakültəsinin Hidrometeorologiya kafedrasının müəllimi Nəzrin Qasımova “Xəzər dənizinin hidrometeoroloji şəraiti və iqlim dəyişikliklərinin təsiri” mövzusunda təqdimatla çıxış edib. O, Xəzər dənizinin səviyyəsində müşahidə olunan illik və dövri dəyişiklikləri, bu dəyişikliklərə səbəb olan temperatur fərqləri, buxarlanma və yağıntı balansı kimi amilləri elmi əsaslarla izah edib. Nəzrin Qasımova qeyd edib ki, iqlim dəyişikliyi təkcə dənizin səviyyəsinə deyil, həm də sahilyanı ərazilərdə torpaq və su ehtiyatlarına, bioloji müxtəlifliyə və meteoroloji proseslərə təsir göstərir.
Sonda mövzu ilə bağlı fikir mübadiləsi aparılıb.