ABŞ-ın aparıcı ali təhsil müəssisələrindən biri olan Cornell Universiteti federal hökumətlə 60 milyon dollarlıq razılaşma əldə etdiyini açıqlayıb.
“Təhsil365” xəbər verir ki, Bu razılaşma, Tramp administrasiyası tərəfindən bu ilin əvvəlində universitetə qarşı vətəndaş hüquqları pozuntusu ittihamları ilə dayandırılan 250 milyon dollarlıq federal tədqiqat maliyyəsinin bərpasına yönəlib.
Cornell prezidenti Michael I. Kotlikoff-un cümə günü yaydığı məktubda qeyd olunub ki, universitet üç il ərzində hökumətə 30 milyon dollar ödəyəcək və əlavə olaraq ABŞ kənd təsərrüfatının inkişafına yönəlik tədqiqatlara 30 milyon dollar sərmayə qoyacaq.
Müqaviləyə əsasən, universitet qanun pozuntusunu qəbul etmir və heç bir hüquqi məsuliyyət üzərinə götürmür. Sənəddə Cornell-in öz qəbul məlumatlarını – irqi göstəricilər, orta qiymətlər və test nəticələri daxil olmaqla – federal hökumətlə bölüşəcəyi bildirilir. Eyni zamanda, universitet Ədliyyə Departamentinin müxtəliflik, bərabərlik və inklüzivlik (DEI) proqramlarının məhdudlaşdırılması ilə bağlı memorandumuna uyğun davranmaq və əməkdaşlarını bu istiqamətdə təlimatlandırmaq öhdəliyini də qəbul edib.