Azərbaycanın Koreyadakı səfirliyinin təşkilatçılığı və Azərbaycan Diasporuna Dəstək Fondunun dəstəyi ilə Seul Milli Universitetində “Kitabi-Dədə Qorqud” dastanının 6 boyunun Koreya dilinə tərcüməsindən ibarət kitab təqdim olunub.
“Tehsil365” AZƏRTAC-a istinadla xəbər verir ki, səfir Ramin Həsənov çıxışında Azərbaycan və Koreya arasında elmi-mədəni əməkdaşlıqdan danışaraq qeyd edib ki, xalqların oxşar dəyərləri və Ural-Altay dil ailəsinə mənsub olmaları mədəni əlaqələri gücləndirir. O bildirib ki, kitabın Koreya dilində nəşri iki ölkə arasında mədəni əməkdaşlığın növbəti nümunəsidir və Koreya ictimaiyyətinə Azərbaycanın milli irsini daha yaxından tanımaq imkanı yaradır. Çap olunmuş 1000 nüsxə Koreyanın müxtəlif kitabxanalarına hədiyyə ediləcək.
Diaspor Fondunun icraçı direktoru Əkrəm Abdullayev Koreyadakı Azərbaycan diasporunun və xüsusilə gənclərin fəaliyyətindən bəhs edib, onların elm və incəsənət sahələrində uğurlarını yüksək qiymətləndirib.
Professor Banq Min Ho dastanın Azərbaycanın qədim tarixi və zəngin folkloru barədə geniş təsəvvür yaratdığını vurğulayıb, Koreya dilinə tərcümənin ölkəsində Azərbaycanın mədəniyyətinə marağı artıracağını bildirib.
Tərcümənin həmmüəllifi Li Sucin layihənin yaranma prosesi, boyların seçimi və iki xalqın folklorundakı oxşarlıqlardan danışıb.
Tədbirdə elmi-mədəni dairələr, media nümayəndələri, diaspor fəalları və tələbələr iştirak edib, Azərbaycanın mədəniyyətini əks etdirən çap materialları və suvenirlər təqdim olunub.