14 noyabr 2025-ci il tarixdə Naxçıvan Dövlət Universitetinin Elmi Kitabxanasında NDU Musiqi Kollecinin direktoru, əməkdar müəllim Məhəbbət Babayeva və kollecin müəllimi, Prezident mükafatçısı Sevinc Babayevanın həmmüəllifi olduqları “İrəvanlı qanun ifaçısı Asya Tağızadə” metodik vəsaitinin təqdimat mərasimi keçirilib. Nəşr qanun ifaçılığı məktəbinin inkişafı və Azərbaycanın musiqi irsinin qorunması baxımından böyük əhəmiyyət kəsb edir.
“Tehsil365” kollecin məlumatına əsasən xəbər verir ki, tədbirdə NDU-nun elmi katibi Orxan Cəfərov, Xalq çalğı alətləri kafedrasının müdiri İsmayıl Mürsəlov, əməkdar müəllim Səmirə Hüseynova, Elmi kitabxananın direktoru Xumar Məmmədova və Asya Tağızadənin qızı, musiqiçi və rejissor Zülfiyyə xanım iştirak edərək vəsaitin elmi-pedaqoji dəyərini və Asya Tağızadənin sənət yolunu vurğulayıblar.
Çıxışlarda qeyd olunub ki, Asya Tağızadə yalnız İrəvan musiqi mühitinin deyil, bütövlükdə Azərbaycan musiqi mədəniyyətinin parlaq simalarından biridir. Onun ifaçılıq üslubu və sənətə yanaşması bu gün də musiqiçilər və tədqiqatçılar üçün nümunə hesab olunur. Metodik vəsait həm pedaqoqlar, həm tələbələr, həm də milli musiqi irsinə maraq göstərən oxucular üçün qiymətli mənbədir.
Tədbirin bədii hissəsində Sevinc Babayevanın tələbələri müxtəlif musiqi nömrələri ilə çıxış edərək mərasimin əhəmiyyətinə xüsusi rəng qatıb. Gənc ifaçıların səsləndirdiyi əsərlər həm müəlliflərin zəhmətini, həm də Asya Tağızadənin zəngin musiqi irsinə ehtiramı əks etdirib.
Tədbir iştirakçıları müəllifləri təbrik edərək onlara yeni yaradıcılıq uğurları və elmi-pedaqoji fəaliyyətlərində davamlı nailiyyətlər arzulayıblar.