Elm və təhsil naziri Emin Əmrullayev açıqlamasında bildirib ki, müəllimlərin dərs yükü həftədə 18-24 saat təşkil edəcək və qalan zamanda müəllim şagirdlərlə işləyəcək. Yəni ki, müəllimlər də iş saatı 09:00-18:00 qrafiki ilə ilə könüllülük əsasında olacaq. Mövzu ilə bağlı fikirlərini “Təhsil 365”-ə bildirən repetitor, təhsil eksperti Cahid İmanlı bildirdi ki, müəllimlərin daimi iş modelinin yaradılması müsbət fikirdir. Lakin onun fikrincə, bu, nəzəriyyədə asan görünsə də, praktikada çoxlu çətinliklərlə üzləşəcək:
"Birincisi ona görə ki, müəllimin maaşı onu tam qane etməlidir ki, əlavə işə ehtiyac duymasın. Yəni mövcud vəziyyətdə müəllimin dərs bitən kimi məktəbi tərk etməsinin əsl səbəbi elə budur: dövlətin müəllimə verdiyi maaş onun aylıq xərclərinin 30 faizini belə qane etmir. İndi yeni verilən qanunda əmək haqqı müəllimi yenə də qane etməsə, məktəbdən müəllimlərin kütləvi uzaqlaşması baş verəcək. İkinci bir məsələ məktəblərin infrastrukturu bütün müəllimlərin məktəbdə qalmasını ödəmir. Müəllim məktəbdə qalıb nə ilə məşğul olmalıdır? Məktəbdə müəllimin işləməsi üçün zəruri şərait - yeməkxana, sanitar qovşağı, iş otağı, metodik kabinet, kompüter və davamlı internet, istirahət otağı və s. varmı? Bunlar ciddi suallardır və hər biri haqqında həllledici qərarlar verilib, sonra qanun qəbul edilməlidir. Sadə bir misal çəkirəm. 150 müəllimi olan bir məktəbdə müəllimlər üçün cəmi 2 sanitar qovşağı nəzərdə tutulur və ya iki növbəli məktəbdə müəllimlərin otura biləcəyi cəmi bir boş otaq - müəllimlər otağı olur ki, hansı ki, 20 müəllim ancaq otura bilər. Belə şəraitdə hansı keyfiyyətdən, hansı işdən danışmaq olar. Vallah bu qanunun bizdə tətbiqi "qoyun sürüsünü bir yerə yiğmaq" anlamı daşıyır. Tam əminliklə deyirəm, bu qanun qəbul edilərsə, Azərbaycan təhsilinə ən böyük zərbə olacaq"