"2026-cı ilin yay ayından nəzərdə tutulmuş marşrut üzrə Qazaxıstandan Azərbaycana Xəzər dənizinin dibi ilə fiber-optik kabel çəkilməsinə başlanacaq".
“Təhsil365” xəbər verir ki, bunu jurnalistlərə açıqlamasında rəqəmsal inkişaf və nəqliyyat nazirinin müavini Saməddin Əsədov deyib.
O bildirib ki, kabelin istehsalı 2026-cı ilin yay aylarına qədər bitəcək:"Azərbaycan və Qazaxıstan arasında Xəzər dənizinin dibindən çəkiləcək fiber-optik rabitə əlaqəsi mövzusu ilk dəfə 2019-cu ildə Azərbaycan və Qazaxıstan arasında Hökumətlərarası Komissiyanın iclası zamanı müzakirə olunub. Ötən il ərzində görülən işlər nəticəsində Qazaxıstan tərəfindən layihənin operatoru "KazakhTelecom" Azərbaycan tərəfindən "AzerTelecom" şirkəti seçilib. Bu iki operator arasında əməkdaşlıq sazişi imzalanıb.Hazırda Xəzər dənizində həmin fiber-optik kabelin keçəcəyi marşrutun analizləri yekunlaşıb. Yaxın zamanlarda bu işləri həyata keçirən şirkətlərə, operatorlara hesabat təqdim olunacaq.Həmçinin Xəzər dənizinin dibi ilə çəkiləcək fiber-optik kabelin istehsalı üzrə işlərə başlanıb.Kabelin istehsalı 2026-cı ilin yay aylarına qədər bitəcək. 2026-cı ilin yay ayından nəzərdə tutulmuş marşrut üzrə Qazaxıstandan Azərbaycana Xəzər dənizinin dibi ilə fiber-optik kabel çəkilməsinə başlanacaq. 2026-cı ilin sonuna qədər çəkiliş üzrə işlərin tam yekunlaşdırması və istifadəyə verilməsi planlaşdırılır".Nazir müavini əlavə edib ki, bu kabel Xəzər dənizinin altından keçməklə böyük rəqəmsal dəhlizin əhəmiyyətli parçası olacaq:"Azərbaycan Respublikası Rəqəmsal İnkişaf və Nəqliyyat Nazirliyi olaraq layihənin operatorlarına dəstəyimizi davam etdiririk. Əminik ki, bu rabitə əlaqəsinin yaradılması ölkəmizin çox yaxın gələcəkdə regional müstəvidə İKT sahəsində, süni intellektdən istifadə sahəsində haba çevrilməkdə əhəmiyyətli rol oynayacaq".