Müasir Azərbaycan ədəbiyyatında psixoloji dərinliyi, hadisələrin çoxqatlılığı və sirli atmosferi ilə seçilən əsərlərdən biri də yazıçı Rəvanə Kərimovanın qələmə aldığı “Qanlı Qədəh” romanıdır.
“Tehsil365” xəbər verir ki, Əsər oxucunu yaddaş, zaman və reallıq arasında incə sərhəddə qərar tutmuş bir hekayəyə aparır.
Əsərin baş qəhrəmanı – əvvəllər jurnalist olmuş, indi isə restoran sahibi olan Fəridə, bir axşam təsadüfən deyil, planlı şəkildə aparıldığı bir anbarda keçmişi ilə üz-üzə qalır. Burada o, tanımadığı bir adamın başqa birinə iynə vurduğunu, sonrasında isə həmin şəxsin aqressiv davranışlar sərgilədiyini müşahidə edir. Elə bu anda Fəridə, yaddaşını itirdiyi dövrlə bağlı əsl həqiqətlərlə üzləşir: onun yaddaş itkisi travmanın deyil, məqsədli şəkildə ona verilmiş dərmanların nəticəsidir.
Əsər boyunca oxucu suallarla üz-üzə qalır: Fəridə kimdir? Onun keçmişi niyə silinib? Araf Aslanlı ilə onu nə bağlayır? Bu suallar əsərin gərginliyini qorumaqla yanaşı, oxucunu daim düşünməyə məcbur edir.
Rəvanə Kərimovanın öz yaxınını itirməsi fonunda yaranan bu əsər təkcə bir roman deyil – eyni zamanda itki, travma və yaddaşla mübarizənin bədii təcəssümüdür. Müəllifin sözlərinə görə, “Qanlı Qədəh” 2017-ci ildə ilk dəfə düşüncə kimi formalaşıb, 2019-da yazılıb, lakin texniki səbəblərlə silinib və yalnız 2020-ci ildən etibarən yenidən yazılmağa başlanıb.
“Qanlı Qədəh” yalnız bir triller deyil – bu, həm də insanın öz həqiqətinə doğru yola çıxmasıdır. Hər şeyin planlandığı bu dünyada, yaddaş yalnız keçmişi deyil, gələcəyi də formalaşdırır. Əsərdə bir fikir diqqət çəkir:
“Heç kim göründüyü kimi deyil. Bəziləri sirr saxlayır, bəziləri isə sirrin özüdür.”
Bu əsər müasir oxucular üçün həm həyəcanlı, həm də dərin mənalı bir ədəbiyyat nümunəsi olaraq yadda qalır.