Azərbaycanın ərazi bütövlüyü uğrunda şəhid olan "Azərbaycan" qəzetinin əməkdaşı Elgün Dağbəyi oğlu İsmayılovun xatirəsi anılıb.
“Tehsil365” AZƏRTAC-a istinadla xəbər verir ki, şəhidliyinin 31-ci ildönümü ilə əlaqədar redaksiya əməkdaşları ənənəvi olaraq onun doğum günündə İkinci Şəhidlər xiyabanını ziyarət edib, məzarı üzərinə çiçəklər düzüb və dualar oxuyublar.
Redaksiyada davam edən anım mərasimi şəhidlərin xatirəsinin bir dəqiqəlik sükutla yad edilməsi ilə başlayıb. Tədbiri “Azərbaycan” qəzetinin baş redaktoru Bəxtiyar Sadıqov açaraq bildirib ki, hər il Elgün İsmayılovun xatirəsinə həsr olunan yaradıcılıq müsabiqəsinə redaksiya əməkdaşları fəal qoşulurlar. O, Vətən müharibəsində əldə edilən qələbənin Birinci Qarabağ müharibəsində şəhid olanların xatirəsinin gənclər üçün mühüm örnək olduğunu diqqətə çatdırıb.
Baş redaktor qeyd edib ki, Prezident İlham Əliyevin rəhbərliyi ilə aparılan siyasət, eləcə də müharibənin hərbi, diplomatik və informasiya istiqamətlərində qazanılan uğurlar Azərbaycana qalib ölkə statusu qazandırıb və son illərdə şəhidlərin xatirəsinə həsr olunan tədbirlər Zəfər kontekstində keçirilir.
Tədbirdə müsabiqənin qalibləri elan olunub. Redaksiyanın əməkdaşları Vahid Məhərrəmov, Züleyxa Əliyeva və Ülkər Xaspoladova vətənpərvərlik mövzusunda yazdıqları məqalələrə görə qalib olublar.
Qeyd edilib ki, 1974-cü il noyabrın 16-da Bakıda anadan olan Elgün İsmayılov 1993-cü ildə həqiqi hərbi xidmətə çağırılıb. O, 1994-cü ilin yanvarında Kəlbəcər istiqamətində yerləşdirilən briqadanın tərkibində 20 əməliyyatdan 16-da iştirak edib. Mayın 25-dən 26-na keçən gecə Murovun Ömər yüksəkliyi istiqamətində kəşfiyyat tapşırığı zamanı düşmən hücumuna məruz qalıb və şəhid olub. Şəhid Bakıda dəfn edilib.