Azərbaycanlı yazar Rəvanə Kərimovanın qələmə aldığı "Qanlı Qədəh" əsəri oxucunu yaddaşın qaranlıq qatlarına, keçmişin susqun izlərinə və insan psixologiyasının ən incə nöqtələrinə aparır.
“Tehsil365” xəbər verir ki, Yazıçının illər əvvəl yaşadığı şəxsi itkidən ilhamlanaraq yazdığı bu əsər, sadəcə bir gerilim romanı deyil, həm də yaddaş və kimlik üzərinə qurulmuş psixoloji portretdir.
Əsərin əsas qəhrəmanı — keçmiş jurnalist, hazırda restoran sahibi olan Fəridə, bir axşam dondurulmuş meyvələr almaq üçün getdiyi anbarda keçmişinə açılan qaranlıq bir qapı ilə üz-üzə qalır. Burada baş verən hadisələr onun itirdiyi yaddaşı, unudulmuş xatirələri və keçmişdəki qaranlıq oyunları üzə çıxarır.
Rəvanə Kərimova deyir ki, "Burada heç kim göründüyü kimi deyil" fikri əsərin əsas xəttidir və bu mesaj real həyata da aiddir:
“Real həyatımızda da göründüyü kimi olmayan insanlarla qarşılaşırıq. Bunu hər kəsə aid etmək olmaz, amma belə insanların mövcudluğu danılmaz faktdır.”
Yazar əsərdə psixoloji gərginliyi qorumaq üçün qəhrəmanın daxili dünyasına fokuslanır:
“Bəzən, Fəridə keçmişi ilə bağlı səslər eşidir və bu səhnələri yazanda özüm də həmin gərginliyi hiss edirəm. Əsas məsələ yazarkən hiss etməkdir. Belə olanda istədiyim effekti oxucuya da ötürə bilirəm.”
"Qanlı Qədəh" təkcə bir qadının keçmişi ilə üzləşməsi deyil, həm də oxucunun öz şübhələri, xatirələri və həqiqət anlayışı ilə qarşı-qarşıya qalmasıdır. Əsərdə zaman anlayışı sadəcə təqvim deyil, yaddaşın içində baş verən sükutlu, amma güclü bir axındır.
Bu əsərlə Rəvanə Kərimova Azərbaycan ədəbiyyatında psixoloji gerilim janrına öz imzasını atmaqla yanaşı, oxucuya da bir sual verir:
Həqiqətən xatırladıqlarımız doğrudurmu, yoxsa ən yaxşı yalanlar yaddaşımızdadır?