Azərbaycanlı yazıçı Rəvanə Kərimovanın "Qanlı Qədəh" əsəri oxucular arasında maraqla qarşılanır və dərin məna daşıyan suallarla doludur.
“Tehsil365” xəbər verir ki, Əsərin əsas qəhrəmanı Fəridənin taleyi, yaddaşını itirməsi və keçmişi ilə üzləşməsi əsərin əsas mövzularını təşkil edir.
“Fəridənin sonuna qədər sağ qalması mümkün olacaqmı?” sualı isə müəllif tərəfindən məqsədyönlü şəkildə cavabsız saxlanılır. Rəvanə Kərimova bu suala cavab verməklə əsərin əsas sirrini açmaq istəmir və oxucuları düşündürməyə, hərəkətlərini öz təsəvvürlərinə buraxır.
Əsərin dərin mesajı isə insanın keçmişi ilə üzləşmək məcburiyyətində olmasıdır. Müəllif sosial məsələlərə toxunmaqla yanaşı, insani dəyərlər, dostluq, sevgi və nifrət arasındakı incə sərhədləri ortaya qoyur. Onun fikrincə, həqiqət heç vaxt göründüyü kimi olmur və insan keçmişindən qaça bilməz. Qaçmaq, yalnız keçmişin zəhərləyici təsirini artırır; onu qəbul edib üzləşmək isə azadlığa aparan yoldur.
“Qanlı Qədəh” oxuculara həyatın mürəkkəbliyini, insan psixologiyasının dərinliklərini və yaddaşın gücünü anlamağa dəvət edir. Bu əsər hər kəsi öz keçmişi ilə barışmağa və həyatdakı incə həqiqətləri qəbul etməyə çağırır.