“Müasir texnologiya və sosial medianın intensiv istifadəsi gənclərin emosional dayanqlılığına və diqqət funksiyalarına ciddi təsir göstərir. Davamlı xəbər axını, instaqramda və tiktokda reelslərin izlənilməsi, bildirişlər və gənçlərin öz həyatlarını başqaları ilə sosial müqayisə etmələri onların beyninin daimi “oyaq” qalmasına səbəb olur və bu da həm emosional yüklənməni artırır, həm də diqqətin tez yayındığı bir mühit yaradır”.
Bu sözləri “Tehsil365”ə açıqlamasında psixoloq Kərimova Mələk bildirib.
Onun sözlərinə görə,xüsusilə sosial mediada başqaları ilə özünü müqayisə etmək gənclərdə özünəqiymətin azalmasına, emosional həssaslığın artmasına və stressə qarşı daha zəif reaksiyalara gətirib çıxarır.
“Uzunmüddətli rəqəmsal stimullaşdırma nəticəsində beyin real həyatda daha yavaş və sakit proseslərə adaptasiya olmaqda çətinlik çəkir. Buna görə də emosiyaları tənzimləmək və çətin situasiyalarda soyuqqanlı qalmaq bacarığı zəifləyir. Gənclər adətən streslə üzləşdikdə sosial mediaya yönəlir və bu, problemi həll etmək əvəzinə, yalnız qısamüddətli diqqət yayındırması yaradır. Nəticədə stresə qarşı dözümlülük zəifləyir, narahatlıq və emosional tükənmə riski artır”.
“Ümumilikdə, texnologiyanın balanssız istifadəsi gənclərin həm diqqət davamlılığını, həm də emosional dayanıqlılığını azaldır. Bu isə onların gündəlik stresslə effektiv şəkildə mübarizə aparmaq bacarıqlarını zəiflədir. Real həyat bacarıqlarının gücləndirilməsi, rəqəmsal pəhriz və emosional özünütənzimləmə strategiyaları isə bu təsirləri azaltmaqda mühüm rol oynaya bilər. Yaxşı olar ki, gənclər sosial şəbəkədən şəxsi inkişaflarına dəstək olmaq məqsədi ilə istifadə etsinlər və fiziki, psixi sağlamlıqlarına da vaxt ayırmağı gündəlik rejimlərinə daxil etsinlər”.