Prezident İlham Əliyevin Azərbaycan Milli Elmlər Akademiyasının 80 illik yubileyinə həsr olunmuş tədbirdə söylədiyi nitq son dərəcə sərrast, dəlillərə və elmi müşahidələrə əsaslanan bir çıxış oldu. O, dilçilər qarşısında məsələ və problemləri elə qoydu ki, onların gördükləri işin davamı kimi yeni istiqamətlər müəyyənləşdi. Mənə elə gəlir ki, dövlətimizin başçısı hər zaman olduğu kimi, bu dəfə də öz dərin müşahidələrini həm cəmiyyətə, həm də dilçilərə aydın şəkildə çatdıra bildi. Bu, çox dəyərli fikirlər idi.
“Tehsil365” bildirir ki, bu sözləri AZƏRTAC-a açıqlamasında Xalq yazıçısı, akademik Kamal Abdulla söyləyib.
Alim bildirib ki, dil ancaq dilçilərin inhisarı deyildir. Bütün Azərbaycan cəmiyyəti dil haqqında düşünür, onu inkişafına, qorunmasına, gələcək nəsillərə ötürülməsinə öz töhfəsini verməyə çalışır.
“Hələ Ulu Öndər Heydər Əliyev bu istiqamətdə ciddi siyasi addımlar atmışdı. Onun hələ sovet dövründə Kommunist Partiyasına rəhbərlik etməyə başladığı dövrdə Bakı Dövlət Universitetində etdiyi ilk çıxışının Azərbaycan dilində olması böyük çağırış, dərin mesaj idi. Bu addım Ulu Öndərin dilə olan münasibətini açıq şəkildə nümayiş etdirirdi. Bu gün Prezidentin Azərbaycan dilinin inkişafı ilə bağlı gördüyü işlər, söylədiyi fikirlər xalqımız tərəfindən yüksək qiymətləndirilir. Onun bu istiqamətdə verdiyi göstəriş və tövsiyələri həyata keçirməyə hazırıq və artıq müəyyən işlər görülməkdədir”,- deyə Xalq yazıçısı bildirib.