Noyabrın 20-də Azərbaycan Memarlıq və İnşaat Universitetində (AzMİU) “Müasir İpək Yolu üzərində Türk dövlətlərinin sosial-mədəni inteqrasiya prosesləri: çağırışlar və perspektivlər” mövzusunda beynəlxalq elmi konfrans keçirilib.
‘‘Tehsil365’’ xəbər verir ki, tədbir AzMİU, AMEA Fəlsəfə və Sosiologiya İnstitutu və “Ingla International Education Training Center” tərəfindən birgə təşkil olunub.
Açılış mərasimində AzMİU-nun rektoru, professor Gülçöhrə Məmmədova, AMEA Fəlsəfə və Sosiologiya İnstitutunun direktoru, professor İlham Məmmədzadə, Xəzər Universitetinin təsisçisi, professor Hamlet İsaxanlı, AMEA Şərqşünaslıq İnstitutunun direktoru, professor Gövhər Baxşəliyeva, Kokand Universitetinin elmi işlər üzrə prorektoru, professor Zebohan Kobilova və “Ingla International Education Training Center”in rəhbəri Lalə Nəsibova çıxış ediblər.
Açılış nitqlərində müasir İpək Yolunun Türk dövlətləri arasında sosial-mədəni inteqrasiya proseslərinin güclənməsində oynadığı rol, regional əməkdaşlığın genişləndirilməsi, elmi-humanitar əlaqələrin yeni mərhələyə keçidi və qarşıda duran strateji vəzifələr vurğulanıb.
Plenar iclas çərçivəsində bir sıra aktual mövzular üzrə elmi məruzələr təqdim olunub.
Türkiyənin Ərzincan Universitetindən professor Kərəm Karabulut “Türk dünyasında sosial-mədəni inteqrasiya: tarixi irsdən gələcəyə doğru” mövzusunda çıxış edərək Türk dünyasının ortaq mədəni irsinin müasir inteqrasiya modelində oynadığı strukturlaşdırıcı rola diqqət çəkib.
Özbəkistanın Kokand Universitetinin professoru Maqsud Asadov “Along the Modern Silk Road: spiritual elevation and Khorezm enlightenment” mövzusunda məruzəsində müasir İpək Yolu boyunca mənəvi yüksəliş, elmi maarifçilik və Xarəzm elmi ənənələrinin bu gün üçün əhəmiyyətindən danışıb.
Türkiyənin Başkent Universitetinin professoru İsmayıl Aydıngün “İpək yolu boyunca Türk dövlətlərinin sosio-kultural inteqrasiya prosesləri” mövzusunda çıxışında İpək Yolunun tarixən yaratdığı sosial-mədəni şəbəkələşməni, hazırda isə regional inteqrasiyanın sosial elmlər baxımından mahiyyətini təhlil edib.
AMEA Fəlsəfə və Sosiologiya İnstitutunun dosenti Faiq Ələkbərli isə “Türk fəlsəfə tarixi və müasirlik” mövzusunda məruzə edərək Türk fəlsəfə irsinin müasir intellektual mühitdə yenidən qiymətləndirilməsi və aktuallaşdırılması məsələlərinə toxunub.
Plenar məruzələrdən sonra müzakirələr aparılıb və çıxışların elmi-nəzəri nəticələri üzrə bir sıra təkliflər səsləndirilib.
Konfransın ikinci hissəsi bölmə iclasları ilə davam edib.
“Tarixi-mədəni irs və müasir interpretasiyalar” adlı A bölməsinə tarix elmləri doktoru Eynulla Mədətli, “Süni intellekt, rəqəmsallıq və fəlsəfə” mövzulu B bölməsinə isə fəlsəfə elmləri doktoru Füzuli Qurbanov moderatorluq edib.
Bölmə iclaslarında Türk dünyasının tarixi-mədəni sərvətlərinin müasir kontekstdə şərhi, rəqəmsallaşmanın mədəni inteqrasiyaya təsiri, süni intellekt və fəlsəfi baxışların sosial transformasiyadakı rolu kimi məsələlər geniş şəkildə müzakirə olunub.
Konfransın sonunda iştirakçılar Türk dövlətləri arasında humanitar və elmi əlaqələrin möhkəmləndirilməsinin əhəmiyyətini vurğulayaraq gələcək əməkdaşlıq istiqamətləri üzrə təkliflərlə çıxış ediblər.