Azərbaycanın müasir siyasi tarixində elə günlər var ki, bir xalqın taleyini dəyişən dönüş nöqtəsi kimi yaddaşlara həkk olunur.
1992-ci ilin 21 noyabrında yaranan və bir qərinə zəngin inkişaf yolu keçən Yeni Azərbaycan Partiyası da məhz belə bir tarixi çağırışın cavabı, xalqın səsi, sabaha inamın yeni nəfəsi idi. Bu gün artıq 33 il ötür və həmin tarixi yolun ardınca dönüb baxdıqda, bir partiyanın deyil, bütöv bir dövlətin dirçəliş salnaməsi görünür. YAP-ın yaranışı bir siyasi qərarın yox, bir milli ehtiyacın məhsulu idi. Ölkənin taleyində dərin sarsıntıların yaşandığı, xalqın sabaha ümid axtardığı bir zamanda Ulu Öndər Heydər Əliyevin uzaqgörənliyi, xalqla döyünən qəlbi bu ideyanı doğurdu.
Bu ideya təkcə siyasi qüvvənin deyil, dövlətçilik düşüncəsinin, milli həmrəyliyin və inkişaf yolunun əsası oldu. YAP-ın hakimiyyətə gəlişi ilə Azərbaycan sözün əsl mənasında dönüş yaşadı. Ölkəni parçalanmaqdan xilas edən, iqtisadi çöküşü dayanıdıran, vətəndaşları sabaha inandıran sabitlik məhz həmin tarixi illərdə formalaşdı. Bu yol ucalığa aparan yol idi, çünki dövlətçilik möhkəmləndikcə Azərbaycan həm regionda, həm də dünyada öz imzasını yazmağa başladı. 2003-cü ildən etibarən YAP-ın siyasi xətti Prezident İlham Əliyevin rəhbərliyi ilə yeni naxışlar qazandı. Müasir idarəçilik modeli, iqtisadi islahatlar, ordunun güclənməsi, beynəlxalq nüfuzun artması – bunlar artıq 33 illik yolun ikinci irimiqyaslı mərhələsi idi.
Azərbaycanın güclənən dövlət institutu, dünyada tanınan enerji siyasəti, regionun strateji güc mərkəzinə çevrilməsi YAP-ın siyasi xəttinin davamlılığı və xalqdan aldığı etimadın göstəricisidir. YAP-ın 33 illiyi eyni zamanda bir ideyanın, bir amalın uzun və sarsılmaz yoludur. Bu yolun daşını-talvarını xalq özü qoyub. Partiya yalnız siyasi qurum deyil – ölkənin modernləşmə fəlsəfəsi, yeniləşmə enerjisi, düşüncədə və idarəçilikdə dinamikanın daşıyıcısıdır. Bu gün YAP-ın fəaliyyəti yalnız siyasi müstəvidə deyil, sosial, humanitar və elmi-intellektual sahələrdə də yenilikləri ilə seçilir.
Rəqəmsal inkişaf, sosial ədalətin gücləndirilməsi, gənclərin dövlət idarəçiliyində fəal iştirakı – partiyanın müasir dövrün tələblərinə uyğunlaşmasının bariz nümunələridir. 33 il – tarix üçün qısa müddət sayıla bilər. Amma dövlətçilik baxımından bu, bir əsrə bərabər dəyişikliklərin yaşandığı illərdir. Bugün YAP yalnız qürurla dolu keçmişə yox, həm də böyük və iddialı gələcəyə baxır. Qarşıdakı illərdə ölkəni daha da gücləndirmək, müasir dövlət modelini daha da möhkəmləndirmək partiyanın başlıca məqsədidir. YAP-ın 33 illik yolu – yalnız siyasi təqvimdə qeyd olunan tarix deyil. Bu yol Azərbaycanın qurtuluş salnaməsi, inkişaf dastanı və sabaha inamının ifadəsidir. Bu gün YAP – ucalığa aparan yolun 33 illik daşıyıcısı, xalqın etimadından güc alan siyasi iradə, dövlətçiliyin möhkəm dayağıdır.
Azərbaycan Dövlət Pedaqoji Universitetinin müəllimi
Gülöyşə Azadqızı