Azərbaycan Dillər Universitetinin (ADU) tədris məsələləri üzrə prorektoru Şəfəq Şahməmmədova, Konfutsi İnstitutunun direktorları Rafiq Abbasov və Li Jihua Çin Təhsil Nazirliyinin tərəfdaş qurumları ilə birgə təşkil etdiyi 2025-ci il Ümumdünya Çin Dili Konfransında iştirak ediblər.
“Tehsil365” AZƏRTAC-a istinadla xəbər verir ki, konfransın əsas mövzusu “Çin dilinin əlçatanlığını artıran amillər: innovasiya və rəqəmsal texnologiyalar” olub. Tədbirə 200 ölkədən 3000-dən çox nümayəndə, o cümlədən təhsil rəhbərləri, universitetlər, mədəniyyət təşkilatları, ekspertlər və diplomatik korpusun üzvləri qatılıb. Açılış nitqlərində Çin Dövlət Şurasının vitse-prezidenti Dinq Syuesyan və təhsil naziri Huay Cinpenq Çin dili təhsilinin qlobal uğurlarını vurğulayaraq, Konfutsi institutlarının fəaliyyətinin genişləndirilməsinin vacibliyini qeyd ediblər. Çin Xalq Respublikasının Sədri Si Cinpinin konfrans iştirakçılarına ünvanladığı məktub da səsləndirilib.
ADU nümayəndə heyəti Çin dilinin tədrisi, süni intellektdən istifadə edərək biliklərin qiymətləndirilməsi, rəqəmsal kompetensiyalar, HSK imtahanlarının təşkili və mədəniyyətlərarası dialoq mövzularına həsr olunan panel sessiyalarında iştirak edib. Konfutsi İnstitutunun direktorları HSK Qlobal Tərəfdaş Konfransında adaptiv təlim sistemi, HSK Study platforması və yeni tədris materialları ilə bağlı müzakirələrə qatılıblar.
Eyni zamanda, nümayəndə heyəti paralel forumlarda Çin dili mütəxəssislərinin hazırlanması, tədris standartlarının qlobal baxışla yenilənməsi, onlayn-oflayn tədris ekosistemi, çinşünaslıq sahəsində gənc alimlərin yetişdirilməsi və rəqəmsal savadlılıq mövzularını müzakirə edib. Onlar “Sərhədsiz Çin dili” təhsil sərgisində Çin universitetlərinin mübadilə proqramları, elektron öyrənmə platformaları və yeni nəsil simulyatorlarla tanış olublar.
Səfər çərçivəsində Çinin aparıcı universitetləri ilə işgüzar görüşlər keçirilib, həmçinin tərəfdaş Huzhou Universiteti ilə əməkdaşlığın genişləndirilməsi istiqamətində planlar müəyyənləşdirilib.