Mingəçevir Dövlət Universitetinin (MDU) 2020-ci il Vətən Müharibəsində Şəhidlik zirvəsinə ucalmış məzunu Əzəmi Hüseynovun ev-muzeyində qorunan Azərbaycan bayrağı Türkiyə Cumhuriyyətinin İzmir şəhərində yerləşən Dokuz Eylül Universitetinin nəzdində fəaliyyət göstərən Bayrakbilim və Türk Bayraqları Muzeyinə hədiyyə edilib.
"Təhsil365" xəbər verir ki, bu addım həm şəhidimizin əziz xatirəsinə dərin ehtiramın, həm də Azərbaycan–Türkiyə qardaşlığının sarsılmazlığının rəmzi kimi böyük önəm daşıyır.Bayraq əmanəti MDU-ya şəhidin anası Sayad Hüseynova tərəfindən təqdim olunub. O, oğlunun müqəddəs xatirəsini əbədiləşdirən bu təşəbbüsün qardaş ölkədə layiqli şəkildə qarşılanmasından qürur duyduğunu bildirib. MDU rəhbərliyi Sayad xanımın bu nəcib addımına görə ona xüsusi təşəkkürünü ifadə edib.Hazırda Türkiyədə işgüzar səfərdə olan MDUun nümayəndə heyəti bayrağı Dokuz Eylül Universitetinin rəhbərliyinə təqdim edib. Hədiyyəni universitetin prorektoru prof. Dr. Dilşen İnce Erdoğan və Beynəlxalq Əməkdaşlıq Ofisinin müdiri prof. Dr. Mübeccel Danu Durukan Salı qəbul edib. Onlar bu mənalı hədiyyəni böyük ehtiram və duyğusal dəyərlə qarşıladıqlarını vurğulayaraq, bayrağın Türk Bayraqları Muzeyində xüsusi guşədə sərgilənəcəyini bildiriblər.
Universitet rəhbərliyi MDU-nun rektoru Anar Eminova və şəhidin anası Sayad Hüseynovaya təşəkkürnamə təqdim edərək iki ali təhsil müəssisəsi arasında humanitar və mədəni əməkdaşlığın daha da genişlənəcəyinə əminliklərini ifadə edib.Bu addım bir daha təsdiqlədi ki, Azərbaycan–Türkiyə qardaşlığı yalnız rəsmi münasibətlərdə deyil, şəhidlərin əziz xatirəsinə göstərilən ehtiramda da özünün ən ali ifadəsini tapır. MDU bu dəyərli təşəbbüs vasitəsilə həm şəhidimizin ruhuna ehtiramını, həm də “bir millət, iki dövlət” birliyinin sarsılmazlığını bir daha nümayiş etdirib.