AMEA-nın Fəlsəfə və Sosiologiya İnstitutunda YUNESKO-nun təsis etdiyi “Ümumdünya Fəlsəfə Günü”nə həsr olunmuş “Universal və milli dəyər fəlsəfəsinin tətbiqi problemləri” mövzusunda beynəlxalq elmi konfrans keçirilib.
‘‘Tehsil365’’ bildirir ki, YUNESKO-nun təsis etdiyi “Ümumdünya Fəlsəfə Günü”nə həsr olunmuş konfransda Azərbaycan alimləri ilə yanaşı, Türkiyə, İrlandiya, Böyük Britaniya və ABŞ-dan (onlayn) olan alim və mütəxəssislər iştirak ediblər.
Tədbiri giriş sözü ilə açan institutun direktoru fəlsəfə elmləri doktoru, professor İlham Məmmədzadə hər il ənənəvi olaraq keçirilən konfransın əhəmiyyətindən danışaraq, AMEA-nın prezidenti akademik İsa Həbibbəylinin təbrikini tədbir iştirakçılarına çatdırıb. Bu gün münasibətilə hər il Azərbaycanda fəlsəfə elminin inkişafına töhfə verən beynəlxalq konfransların təşkil edildiyini bildirən İ.Məmmədzadə fəlsəfə elminin öyrənilməsinin, fəlsəfi biliklərin cəmiyyətin mənəvi saflığının və sabitliyin qorunmasındakı rolundan danışıb və maarifçiliyin geniş inkişaf etdirilməsində fəlsəfənin rolunun zəruriliyini də vurğulayıb.
Professor qeyd edib ki, Akademiyanın 80 illiyi ilə bağlı keçirilən tədbirdə Prezident İlham Əliyev elmi inkişafında süni intellekt və rəqəmsal texnologiyaların tətbiqinin əhəmiyyətindən danışıb, bu istiqamətin ölkələrin gələcək inkişafında mühüm rol oynadığını bildirib. Dövlət başçısı Azərbaycan dilinin saflığının qorunmasının milli məsələ olduğunu qeyd edib və hər bir vətəndaşın bu işə məsuliyyətlə yanaşmalı olduğunu deyib.
Fəlsəfənin problemlərinə diqqət çəkərək bu istiqamətdə bir sıra işlərin həyata keçirilməsinin vacibliyini qeyd edib. Fəlsəfə və ideologiya haqqında danışan İlham Məmmədzadə fəlsəfəni ideologiyasız və ideologiyanı da fəlsəfəsiz təsəvvür etməyin mümkün olmadığını bildirib.
Tədbirdə çıxış edən akademik Gövhər Baxşəliyeva Fəlsəfə Günü münasibəti ilə konfrans iştirakçılarını təbrik edib, konfransın əhəmiyyətindən və faydasından danışaraq institutun alimlərinə elmi fəaliyyətlərində uğurlar diləyib.
Prezident İlham Əliyevin Azərbaycan Milli Elmlər Akademiyasının 80 illik yubiley yığıncağındakı nitqində Azərbaycan elmi və aliminə yüksək dəyər verməklə bərabər, Azərbaycan elmi qarşısında qoyduğu vəzifədən danışaraq, dövlət başçısının nitqində Azərbaycan dili və tarixi ilə bağlı alimlərə xüsusi tapşırıqların öz əksini tapdığını deyən akademik Prezidentin vurğuladığı əsas məqamlar kimi, Azərbaycan tarixinin daha doğru və elmi şəkildə tədqiqinin, Azərbaycan dilinin saflığının qorunmasının labüdlüyünü vurğulayıb.
Tədbirdə, həmçinin Fəlsəfə və Sosiologiya İnstitutunun şöbə müdiri AMEA-nın müxbir üzvü Könül Bünyadzadə “AMEA-nın prioritetlərində fəlsəfə”, Qalatasaray Universitetinin professoru Paul Ballanfat və Hafssa Bekhelouf “Fəlsəfənin milliliyi (The Nationalism of Philosophy)”, Böyük Britaniya Kral Cəmiyyətinin üzvü, beynəlxalq politoloq Dr. Niel Watson “Qlobal çağırışlar dövründə ümumbəşəri və xüsusi dəyərlərin kəsişməsinin fəlsəfi konteksti (Bridging the universal and the particular:Philosophical values in the era of global challenges)”, Fəlsəfə və Sosiologiya İnstitutunun elmi işlər üzrə direktor müavini tarix elmləri doktoru Eynulla Mədətli “Tarixin fəlsəfəsi və dəyərlərə münasibət”, professor Patrik Uolş “Milli özünüdərkin humanist dünya nizamının formalaşmasındakı rolu (Between the individual and humanity stands, and must continue to stand, a great fact - the nation)”, fəlsəfə elmələri doktoru, professor Əbülhəsən Abbasov “Bakıdan dünyaya yayılmış dəyər Q.S, Altşuller nəzəriyyəsi və məktəbi”, professor Rəna Mirzəzadə “Suveren Azərbaycanda universal dəyərlər: siyasi-hüquqi komponentlər”, fəlsəfə elmləri doktoru Füzuli Qurbanov “Suverenlik fəlsəfəsi haqqında: Azərbaycan konteksti”, fəlsəfə üzrə fəlsəfə doktoru, dosent Məhəmməd Cəbrayılov “Rəqəmsal imperializm və milli suverenliyin qorunması problemi”, fəlsəfə üzrə fəlsəfə doktoru, dosent Şölət Zeynalov “Elmi-texniki tərəqqi və dəyərlər problemi”, fəlsəfə üzrə fəlsəfə doktoru Zaur Rəşidov “Mirzə Şəfi Vazehin nəğmələrinin Almaniyada Märzrevolution sonrası proseslərə təsiri”, fəlsəfə elmləri doktoru, professor Azər Mustafayev “AMEA xalqımızın və dövlətimizin zəngin sərvətidir” və texnika elmləri üzrə fəlsəfə doktoru Heydər İmanov çıxış edərək Fəlsəfə Günü münasibətilə fikirlərini bölüşüblər.