Türkiyədə növbəti ildən uğurlu tələbələrin ali təhsil müəssisələrini 3 il müddətində bitirə bilməsinə imkan yaradacaq yeni tənzimləmə mexanizmi tətbiq olunacaq.
“Təhsil365” xəbər verir ki, bu barədə Türkiyənin Ali Təhsil Şurasının (YÖK) sədri Erol Özvar Universitet–Sektor İş Birliyi Komissiyasının iclasında bildirib. Universitet rektorları və sənaye sahələrinin rəhbərlərinin birgə toplantısında çıxış edən E.Özvar uğurlu gənclərin arzu etdikləri təqdirdə universiteti 3 ilə bitirə və məzun ola biləcəklərini qeyd edib.“Bu sahədə iş aparırıq. Burada əsas məsələ ali məktəbin tədris proqramının nəticələrinin və mənimsənilməsinin tələbə tərəfindən əldə edildiyinin anlaşılması, yoxlanılması və təsdiqlənməsidir. Etməyə çalışdığımız şey eyni və ya yenilənmiş proqramı daha qısa müddətdə bitirə biləcək tələbələrin yolunu açmaqdır. Bu fəaliyyətlərimiz gələn ildən etibarən həyata keçiriləcək”, - deyə YÖK sədri bildirib. Sənaye və xidmət sektorunda ixtisaslı kadr təminatında yaşanan çətinliklərə toxunan E.Özvar bacarıq çatışmazlığının səbəblərini düzgün analiz etməyin əhəmiyyətinə diqqət çəkərək əlavə edib:“Ali Təhsil Şurası olaraq hədəfimiz bütün ekosistemi bu dəyişiklik, transformasiya ilə uğunlaşa biləcək şəkildə yenidən qurmaqdır. Ölkəmizin həm zehni bacarıq tələb edən sahələrdə, həm də tətbiqi biliyi yüksək olan işçi qüvvəsinə ehtiyacı var. Yüksək əlavə dəyər yaratmaq yalnız bu iki bacarıq dəstinin uyğunlaşdırılması ilə mümkün ola bilər. Yəni təkcə fiziki, güc tələb edən bacarıqlara deyil, eyni zamanda ən az onlar qədər intellektual və zehni bacarıqlara ehtiyac var. Bununla yanaşı, beynəlxalq işçi qüvvəsi bazarında istedad cəlb edə biləcək bir mühitin gücləndirilməsi və yenidən bacarıq qazandırma investisiyalarının artırılması da böyük əhəmiyyət daşıyır”.
E.Özvar bildirib ki, dövlət, universitetlər, özəl sektor və qeyri-hökumət təşkilatları birlikdə hərəkət etməli, Türkiyənin milli bacarıq məkanını genişləndirməli, zənginləşdirməli, gəncləri gələcəyin peşələrinə hazırlamalı və çalışanların kompetensiyalarını daim yeniləməlidirlər. “Bu artıq ümumi bir zərurətə çevrilib”.
“Tətbiqi təhsil modelini bütün ölkədə yaymaq istəyirik”
E.Özvar qarşıdakı dövr üçün müəyyən etdikləri ən vacib gündəm maddələrindən birinin də subbakalavr və bakalavr səviyyələrini əhatə edən iş yerində tətbiqi təhsil modelinin genişləndirilməsi olacaq. O, bu günə qədər heç bir məqsədə xidmət etməyən və ya təsirsiz qalan təcrübələri iş yerində peşə təliminə çevirəcəklərini bildirib: “Tələbələrimizin yalnız sinifdə deyil, həm də birbaşa iş yerində təcrübə qazanmasına imkan verəcək bu model onları daha hazırlıqlı, məhsuldar və məşğulluğa yönəlmiş fərdlərə çevirəcək. Əvvəlcə yeddi pilot vilayətdə - Konya, Qaziantep, İstanbul, Bursa, Kocaeli, İzmir və Ankarada tətbiqi təhsil modelini əldə edilən nəticələrdən asılı olaraq qısa müddətdə ölkə miqyasında genişləndirməyi hədəfləyirik. İnanıram ki, bu yanaşma, tələbələrimizin təhsil proseslərini real iş mühitləri ilə birləşdirən və təkcə peşə məktəblərində deyil, həm də bakalavr proqramlarında məşğulluqla birbaşa əlaqə quran ali təhsilə bir yanaşmanı institusionallaşdıracaq".
“Yeni təcrübə modelini tətbiq etməyə tam iradəliyik”
E.Özvar tətbiqi təhsil modelinin ən vacib elementlərindən birinin iş təcrübəsi (staj) olduğunu qeyd edib: “Sizinlə bölüşmək istərdim ki, proqramlarımızı tələbələrimizin 20 günlük kimi qısa və məhsuldar olmayan təcrübələr əvəzinə, kurikulumların təbiətindən asılı olaraq peşə məktəblərində 3+1 və ya 2+2, bakalavr proqramlarında isə 7+1 və ya 6+2 kimi təcrübələr vasitəsilə peşəkar təcrübə qazandıqları bir modelə çevirməyə başlamışıq və bu mövzuda iradəmiz var. Bu, zaman tələb edən, səbir və mərhələli iş istəyən bir prosesdir. Bu model vasitəsilə tələbələrin istehsal proseslərini yaxından tanıması, iş başında bacarıq inkişaf etdirməsi və məzun olduqdan sonra daha sürətli şəkildə məşğulluğa keçməsi mümkün olacaq. Eyni zamanda iş yerlərindən gələn rəylər universitetlərimizin tədris proqramlarının yenilənməsində müəyyənedici rol oynayacaq, sektorun ehtiyaclarına sürətli uyğunlaşan dinamik bir təhsil ekosisteminin formalaşmasına töhfə verəcək”.