Azərbaycan Dövlət Aqrar Universitetində aqrar sahələr üzrə təhsil alan tələbələrin sayı son illər artmaqdadır. Kənd təsərrüfatının ölkə üçün strateji əhəmiyyət daşıması, müasir laboratoriyaların qurulması və yeni tədris imkanları gənclərin bu sahəyə marağını yüksəldir.
Azərbaycan Dövlət Aqrar Universitetinin Torpaqşünaslıq və Aqrokimya ixtisası üzrə I kurs tələbəsi Ayşə Verdiyeva mövzu ilə bağlı “Tehsil365”lə fikirlərini bölüşüb.
Ayşə Verdiyeva bildirib ki, universitet həyatına yeni başlamasına baxmayaraq, doğru seçim etdiyinə əmindir:
“Mənə elə gəlir ki, doğru yerdəyəm — həm mühit, həm müəllimlər, həm də tədris prosesi baxımından.”
Onun sözlərinə görə, ADAU-nun güclü elmi bazası və təcrübəli müəllim heyəti tələbələrin peşəkar yetişməsinə ciddi töhfə verir. O deyir ki, müasir laboratoriyalar, praktik dərs sahələri və zəngin kitabxana fondları tələbələrin bilik və bacarıqlarını artırmağa kömək edir.
Ayşə seçdiyi ixtisasın ölkə üçün xüsusi əhəmiyyət daşıdığını vurğulayıb:
“Torpaq bizim həyat qaynağımızdır. Biz torpağın quruluşu, xüsusiyyətləri və onun qorunması barədə elmi biliklər öyrənirik.”
O qeyd edib ki, dərslər həm nəzəri, həm də praktiki şəkildə keçirilir. Tələbələr tez-tez sahə təcrübələrində iştirak edir və bu da onları real iş mühitinə yaxınlaşdırır.
Ayşə həmçinin tələbələr arasında əməkdaşlıq və dostluq mühitinin önəmini xüsusi vurğulayıb. Onun sözlərinə görə, universitetdə keçirilən seminar və sərgilər tələbələrin elmi baxımdan inkişafına şərait yaradır.
Sonda Ayşə Verdiyeva gələcək planları ilə bağlı belə deyib:
“Bu bilik və bacarıqları gələcəkdə ölkəmə, torpağıma və insanlara xidmət üçün istifadə etmək istəyirəm.”