Gənclər arasında sosial media istifadəsinin artması onların psixoloji vəziyyətinə həm müsbət, həm də mənfi təsirlər göstərir.
“Tehsil365” xəbər verir ki, bu barədə psixoloq Cəmilə Rəhimli məsələni şərh edərkən bildirib ki, “sosial şəbəkələr bir tərəfdən özünüifadə və ünsiyyət imkanları yaradır, digər tərəfdən isə psixoloji yüklənməni artırır.”
Psixoloqun sözlərinə görə, “sosial şəbəkədə uzun müddət vaxt keçirmək diqqət və fokus problemlərinə, yuxu pozuntularına, məhsuldarlığın azalmasına səbəb olur. Bundan əlavə, real sosial münasibətlərdən uzaqlaşma və sosial media asılılığı riski də artır.”
Mütəxəssis vurğulayıb ki, “gənclərin idealizə olunmuş paylaşimlarla özlərini müqayisə etməsi özünəinamın zəifləməsinə, bədən imici narazılığına, təşviş və depressiv əlamətlərin güclənməsinə gətirib çıxarır.” “Bu, gənclərdə özünə qarşı həddindən artıq tənqidi münasibət və şəxsiyyət inkişafında təhriflər yarada bilir”, – deyə psixoloq qeyd edib.
Sosial media asılılığını tanımaq üçün müəyyən əlamətlərin olduğunu bildirən mütəxəssis onları belə sadalayıb: “istifadəyə nəzarətin itməsi, daha çox onlayn qalma ehtiyacı, yuxu və dərs vaxtının sosial media səbəbilə pozulması, onlayn olmadan narahatlıq hissi və real münasibətlərin zəifləməsi.”
Psixoloq gənclərə sağlam istifadə üçün bir sıra tövsiyələr də verib. Onun sözlərinə görə, “ekran limiti qoymaq, yatmazdan əvvəl 1–2 saat telefondan uzaqlaşmaq, izlənilən kontenti şüurlu seçmək və özünü başqaları ilə deyil, şəxsi inkişafla müqayisə etmək vacibdir. Bundan əlavə, real sosial mühit, idman və hobbilərə vaxt ayırmaq psixoloji tarazlığın qorunmasına kömək edir.”