Noyabrın 21-də Azərbaycan Dillər Universitetində “Süni intellekt və humanitar elmlər: Müasir vəziyyət və perspektivlər” adlı beynəlxalq elmi konfransın açılış mərasimi olub.
“Tehsil365” bildirir ki, konfransın açılış mərasimində bir sıra ölkələrin səfirləri, diplomatlar, alimlər, ictimaiyyət nümayəndələri və tələbələr iştirak ediblər.
Əvvəlcə tədbir iştirakçıları Azərbaycan Dillər Universitetinin foyesində ulu öndər Heydər Əliyevin büstü önünə gül dəstələri düzüb, xatirəsini ehtiramla anıblar.
Dövlət Himni səsləndirilib. Daha sonra “Gaudeamus” tələbə himni ifa olunub.
ADU-nun rektoru, akademik Kamal Abdulla konfrans iştirakçılarını salamlayıb, tədbirin əhəmiyyətindən söz açıb. Qeyd olunub ki, müasir dünyada süni intellektlə bağlı aparılan tədqiqatlar və araşdırmalar həyat fəaliyyətinin demək olar ki, bütün sahələrində özünü göstərməkdədir:
“Bu gün universitetimizdə əlamətdar bir gündür. Mən çox şadam ki, konfransımızda Azərbaycanda fəaliyyət göstərən bir sıra ölkələrin səfirləri, diplomatlar iştirak edir. Böyük məmnuniyyətlə qeyd etmək istəyirəm ki, konfransımızda İsrail, Belarus, Venesuela, Mərakeş, Birləşmiş Ərəb Əmirlikləri, Gürcüstanın ölkəmizdəki səfirləri iştirak edir və onlara səmimi qəlbdən təşəkkür edirəm, “xoş gəlmisiniz” deyirəm.
Konfrasımızda İtaliyadan, İspaniyadan, Mərakeşdən, Rumıniyadan, Özbəkistandan, Türkiyədən, Pakistandan, Ukraynadan, Rusiyadan, Belarusdan, Qazaxıstandan olan qonaqlarımız var, onlara da “xoş gəlmisiniz” deyirəm.
Eyni zamanda konfransımızda iştirak edən mütəxəssislər arasında əllidən çox ölkənin nümayəndələri konfransımızda iştirakçı kimi qeydiyyatdan keçib və biz onların maraqlı mərzuləri ilə tanış olacağıq.
Həmçinin Azərbaycanın bir sıra aparıcı ali təhsil müəssisələrindən Bakı Dövlət Universiteti, Azərbaycan Prezidenti yanında Dövlət İdarəçilik Akademiyası, ADA Universiteti, Dövlət Təhlükəsizliyi Xidmətinin Heydər Əliyev adına Akademiyası , Xəzər Universiteti, Bakı Slavyan Universiteti, Azərbaycan Dövlət İqtisad Universiteti, Qərb Universiteti, Azərbaycan Turizm və Menecment Universiteti, Bakı Biznes Universiteti, Sumqayıt Dövlət Universiteti, Bakı Mühəndislik Universiteti, Azərbaycan Dənizçilik Akademiyası, Bakı Avrasiya Universiteti, Azərbaycan Dövlət Pedaqoji Universiteti, Lənkəran Dövlət Universiteti, Naxçıvan Dövlət Universiteti, Azərbaycan Dövlət Neft və Sənaye Univeristeti və digər ali təhsil müəssisələrindən olan mütəxəssislər konfransda iştirak edir və onlara da öz təşəkkürümüzü bildiririk.
Konfrans “Dil və süni intellekt”, “Süni intellekt və tərcümə məsələləri”, “Ədəbiyyat süni intellekt dövründə”, “Xarici dillərin tədrisində süni intellektin rolu”, “Fəlsəfə və psixologiyaya dair tədqiqatlarda süni intellekt problem”, “Süni intellekt və media tədqiqatları” mövzusunda altı bölmə üzrə təmsil olunub.
İnanıram ki, konfrans müasir elmi aktuallığı ilə seçiləcəkdir və ən əsası gələcək elmi, mədəni əməkdaşlığımıza öz töhfəsini verəcəkdir.
Hörmətli qonaqlar, cənab səfirlər, diplomatlar sizi bir daha universitetdə görməyimizdən məmnunluğumuzu bildiririk. Bizi bir-birimizə bağlayan güclü xətlər var, biz çox istərdik ki, bu xətlər elmi istiqamətdə də davam etsin, bu gün sizin konfransımıza və universitetimizə göstərdiyiniz maraq bizim üçün çox qiymətlidir. Konfransın işinə uğurlar arzu edirik. Yaşasın konfrans”!
AMEA-nın müxbir üzvü, Azərbaycan Dövlət Neft və Sənaye Universitetinin professoru Rafiq Əliyev konfransla bağlı fikirlərini söyləyib.
Qeyd olunub ki, konfransın mövzusu müasir dünyada elmə yeni yanaşmanı və tədqiqat imkanlarını qiymətləndirmək, humanitar elmlərlə süni intellektin qarşılıqlı şəkildə öyrənilməsi baxımından yüksək əhəmiyyətə malikdir.
Konfransın süni intellektlə humanitar elmlərin qarşılıqlı şəkildə öyrənilməsi baxımından ilklərdən olduğunu bildirən professor Rafiq Əliyev süni intellektin humanitar sahələrə təsirinin, tədqiqat və tədris prosesində tətbiq imkanlarının genişləndirilməsinin vacibliyini diqqətə çatdırıb və konfrans iştirakçılarına uğurlar arzu edib.
Türkiyənin Hacettepe Universitetinin Fransız dili və ədəbiyyatı kafedrasının müdir müavini Eylem Aksoy Alp çıxışında konfransın beynəlxalq əməkdaşlıq və elmi əlaqələrin qurulması baxımından önəmindən söz açıb.
Bildirilib ki, konfrans öz aktuallığı ilə seçilir və gənc alimlər üçün yeni üfüqlər açır, həmçinin beynəlxalq əlaqələrin qurulması, elmi əməkdaşlıq baxımından önəmli hadisə kimi mühüm əhəmiyyətə malikdir.
Pakistanın Kompüter və İnkişaf etməkdə olan Milli Elmlər Universitetinin Humanitar Elmlər fakültəsinin dekanı Summaira Sarfraz konfransda video müraciətlə çıxış edib. Video müraciətdə konfransın işi və perspektivləri barəsində fikir bildirən qonaq müasir elmi biliklərin yeni formatda təqdimatını və araşdırılmasını alqışladığını, gələcək elmi tədqiqat və araşdırmalar üçün konfransın vacib olduğunu söyləyib.
İspaniyanın Alkala Universitetinin Dil və ədəbiyyatın tədrisi fakültəsinin dekanı Xesus Qarsia Laborda konfransın təşkilatçılarına və ADU rəhbərliyinə öz təşəkkürünü bildirib. Söylənilib ki, elmi, mədəni əməkdaşlıq və beynəlxalq əlaqələrin inkişafı baxımından konfrans öz aktuallığı ilə seçilir.
AMEA-nın Nəsimi adına Dilçilik İnstitutunun Süni intellekt kompüter dilçiliyi şöbəsinin müdiri Məsud Məmmədov konfransın keçirilməsinə görə ADU rəhbərliyinə və kollektivinə öz təşəkkürünü bildirib, konfransın əhəmiyyətindən danışıb. Konfrans Prezident İlham Əliyevin Süni intellektlə bağlı sərəncamına və bu sahədə mütəxəssislərin yetişdirilməsi istiqamətində verilən ən mühüm töhfələrdən biridir.
Rumıniyanın Aleksandru İoan Kuza adına Yassı Universitetinin professoru Lyudmila Bejenaru konfrans iştirakçılarını salamlayıb, konfransın işinə uğurlar arzu edib. Qonaq deyib ki, ADU beynəlxalq əlaqələrin qurulması və elmi əməkdaşlığın aparılması imkanlarını ən yüksək səviyyədə özündə ehtiva edən ali təhsil müəssisələrindən biridir.
Moskva Dövlət Linqvistik Universitetinin Layihə ofisinin direktoru Olqa Yeqorova konfransda iştirakından məmnunluğunu bildirirərək, ADU rəhbərliyinə və kollektivinə öz səmimi təbriklərini çatdırıb.
Konfransın aktuallığını və əhəmiyyətini yüksək qiymətləndirən qonaq iştirakçılara uğurlar arzu edib.
Almaniyanın DAAD-nin ADU-da nümayəndəsi Liza Brandt çıxışında konfransın müasir elmi çağırışlara və yeniliklərə uyğun olduğunu və beynəlxalq əməkdaşlıq perspektivlərinin aktuallığını diqqətə çəkib.
İtaliyanın Sapienza Universitetinin əməkdaşı Mario Soldaini konfrans iştirakçılarını salamlayıb, konfransın beynəlxalq əhəmiyyətini yüksək qiymətləndirib.Bildirilib ki, konfransa maraq böyükdür və iştirakçılar üçün əlverişli imkanlar yaradılıb.
Konfrans işini bölmə iclasları ilə davam etdirib.
Qeyd edək ki, konfrans altı bölmə üzrə işini davam etdirəcək və dilçilik (koqnitiv dilçilik, neyrolinqvistika, korpos dilçiliyi, sosiolinqvistika), tərcüməşünaslıq (maşın tərcüməsi), ədəbiyyatşünaslıq (Ədəbiyyat süni intellekt dövründə), xarici dillərin tədrisi metodikası, psixologiya və fəlsəfə, media tadqiqatları mövzusunda hazırlanan məruzələr dinlənəcək.