ADU-nun Şərq Ölkələri kafedrasının müəllimi Şəhla Xələfova, Qafqazşünaslıq və Azərbaycan tarixi kafedrasının müəllimləri Aysel Nəhmətova və Fidan Bayramova AR Elm və Təhsil Nazirliyinin akademik H. Əliyev adına Coğrafiya İnstitutunda Azərbaycan Respublikasında 2025-ci ilin “Konstitusiya və Suverenlik İli” elan olunması və Coğrafiya İnstitutunun yaradılmasının 80 illik yubileyi münasibətilə keçirilən “Coğrafiyanın müasir problemləri: Elm və təhsilin inteqrasiyası” mövzusunda IV Beynəlxalq elmi-praktik konfransda iştirak ediblər.
“Tehsil365” xəbər verir ki, iki gün davam edən konfrans Azərbaycan Coğrafiya İnstitutu, Coğrafiya Cəmiyyəti, Turizm və Menecment Universiteti, Qərbi Kaspi Universiteti, Dövlət Pedaqoji Universitetinin Quba filialı, eləcə də Almaniyanın Yustus Libix Universiteti, Türkiyənin Bursa Uludağ Universiteti, Qazaxıstanın Coğrafiya və Su Təhlükəsizliyi İnstitutu və Manaş Kozıbayev adına Şimali Qazaxıstan Universiteti, Mirzo Uluqbek adına Özbəkistan Milli Universiteti, Gürcüstanın Vaxuşti Baqrationi adına Coğrafiya İnstitutu, Rusiya Sosial Coğrafiyaçılar Assosiasiyası, Dağıstan Dövlət Texniki Universiteti və R. Qəmzətov adına Dağıstan Dövlət Pedaqoji Universitetinin birgə təşkilatçılığı ilə baş tutub.
Konfrans çərçivəsində Şəhla Xələfova “Şərqi Zəngəzur və Qarabağ iqtisadi regionlarının aparılan bərpa-quruculuq işləri əsasında Azərbaycan iqtisadiyyatına inteqrasiyası”, Fidan Bayramova “The impact of relief on land use in Karabakh”, Aysel Nəhmətova isə “Impact of climate change on the hydrological regime: dynamics of water discharge change in the main rivers of the Greater Caucasus and future projections” mövzularında çıxış ediblər.