Azərbaycan Dillər Universitetinin (ADU) Beynəlxalq Münasibətlər və Regionşünaslıq fakültəsinin təşkilatçılığı ilə 20 noyabr 2025-ci il tarixində Böyük Qayıdışa dair I Dövlət Proqramının icrasına həsr olunmuş “Qarabağa Qayıdış” adlı elmi seminar keçirilib.
“Tehsil365” bildirir ki, tədbiri giriş sözü ilə Qafqazşünaslıq və Azərbaycan tarixi kafedrasının müəllimi Aysel Nəhmətova açaraq, Böyük Qayıdış Dövlət Proqramının işğaldan azad olunmuş Qarabağ və Şərqi Zəngəzur ərazilərində həyatın bərpası və dayanıqlı inkişafın təmin edilməsi məqsədilə hazırlanmış strateji yol xəritəsi olduğunu vurğulayıb. O qeyd edib ki, proqramın əsas hədəfi təhlükəsiz yaşayış mühitinin yaradılması, müasir infrastrukturun qurulması və əhalinin mərhələli şəkildə öz yurdlarına qayıdışının təmin edilməsidir. Burada “ağıllı şəhər” və “ağıllı kənd” konsepsiyalarının tətbiqi, ekoloji bərpa, alternativ enerji və yaşıl inkişaf prioritet istiqamətlər kimi müəyyənləşdirilib. Dövlət Proqramı həmçinin iqtisadi fəaliyyətin canlandırılmasını, kənd təsərrüfatı, turizm və sənaye üzrə yeni inkişaf modellərinin qurulmasını nəzərdə tutur. Beləliklə, Böyük Qayıdış Dövlət Proqramı Azərbaycanın post-münaqişə dövründə ən mühüm inkişaf çərçivələrindən birini təşkil edir.
Şərq ölkələri üzrə regionşünaslıq kafedrasının müəllimi Aysel Kərimova “Qarabağ Alban irsi: tarixi gerçəkliklərin bərpası” mövzusunda çıxış edərək Qafqaz regionunun Qafqaz Albaniyası mədəniyyətinin ən mühüm mərkəzlərindən biri olduğunu, işğal dövründə qədim alban məbədləri, monastırları və arxeoloji abidələrin bir qisminin dağıdıldığını və ya mənşəyinin təhrif edildiyini qeyd edib.
Fəlsəfə və ictimai elmlər kafedrasının müəllimi Tural Cəfərov “Qayıdış ideyasının milli şüurumuzdakı təcəssümü” mövzusunda çıxış edərək qayıdış ideyasının Azərbaycan milli düşüncəsində yalnız fiziki torpağa dönüş anlamı daşımadığını, həm də tarixi ədalətin bərpası və milli varlığın bütövləşməsi kimi dərin mənəvi məzmun kəsb etdiyini vurğulayıb.
Qafqazşünaslıq və Azərbaycan tarixi kafedrasının müəllimi Aysel Nəhmətova “Böyük Qayıdış və ekosidə məruz qalmış torpaqlarımızın bərpası” mövzusunda çıxış edərək “Böyük Qayıdış” proqramı çərçivəsində regionun ekosistemlərinin yenidən qurulması, biomüxtəlifliyin dirçəlməsi, təbii resursların səmərəli idarə olunması və dayanıqlı inkişafın institusional təminatının vacibliyini qeyd edib.
Beynəlxalq münasibətlər kafedrasının müdiri professor Aida Yusifova,
Qafqazşünaslıq və Azərbaycan tarixi kafedrasının müdiri dosent Xatirə Hacıyeva,
Fəlsəfə və ictimai elmlər kafedrasının müdiri dosent Ədalət Abdiyeva,
Şərq ölkələri üzrə regionşünaslıq kafedrasının müdiri dosent Nigar Əfəndiyeva,
Qərb ölkələri üzrə regionşünaslıq kafedrasının müdiri professor Sevdagül Əliyeva,
“Qafqazşünaslıq və Azərbaycan tarixi” kafedrasının dosenti Asif Abbasov və dosent Namiq Kərimov müzakirələrə qoşularak mövzu ilə bağlı fikirlərini bildiriblər.