Noyabrın 20-də Azərbaycan Dillər Universitetinin İngilis və Fransız dilləri fakültəsinin Fransız dilinin leksikologiyası və üslubiyyatı kafedrasının təşkilatçılığı ilə “Fransız dili müəllimliyi” ixtisasının 430b və 223a qrup tələbələrinin iştirakı ilə “Narkomaniyaya Yox De! Həyatı Seç!” mövzusunda dəyirmi masa olub.
“Tehsil365” bildirir ki, tədbirin moderatoru, kafedranın baş müəllimi Kəmalə Kərimova dəyirmi masanın təşkil edilməsinin məqsədini və əhəmiyyətini vurğulayaraq, iştirakçılara Azərbaycan Prezidenti İlham Əliyevin sərəncamı ilə narkomaniyaya qarşı mübarizə məqsədilə qəbul edilmiş 5 illik dövlət proqramları haqqında ətraflı məlumat verib.
Sonra 430b qrupundan Hüseynova Fidan narkomaniyanın səbəbləri, Axundzadə Məntuqə narkomaniyanın nəticələri, Babayeva Jalə və Səmədli Nigar Azərbaycanda və beynəlxalq proqramlar səviyyəsində narkomaniyaya qarşı mübarizə, Novruzova Aytən isə Azərbaycan ədəbiyyatında narkomaniya mövzusuna həsr edilmiş əsərlər haqqında çıxışlarını təqdim ediblər.
Tədbirdə Muradova Xanımgül, Aslanova Nəzrin (430b qrupu), Hüseynəliyeva Səbihə və Mustafalı Əsmər (223a qrupu) aktiv müzakirələrdə iştirak ediblər. Hacıyeva Aysel, Əlizadə Fatimə (223a) və Tanrıverdiyeva Aytacın (223c) hazırladıqları poster və slaydların təqdimatı tədbirin əyani təsir gücünü daha da artırıb.
Kafedranın dosenti, f.f.d. Məqami Aygün və baş müəllim Rəfiqə Mürşüdova da mövzu ilə bağlı çıxış edərək, tələbələrin bu məsələyə həssas yanaşmalarını yüksək qiymətləndiriblər və müasir nəslin narkomaniyayla mübarizədə fəallığını vurğulayıblar.
Kafedranın baş müəllimi Əzizə Məmmədova “Yox demək və qrup, dost təzyiqinə müqavimət göstərməyi bacarmaq” mövzusunda çıxışı ilə tələbələrə əhatə dairələrini daha təmiz insanlarla genişləndirmək və doğru dost seçmək barədə əhəmiyyətli mesajlar çatdırıb.
Fakültə dekanı, f.f.d. dos. Vəfa Babayeva, narkomaniya əleyhinə maarifləndirmənin əhəmiyyətini vurğulayaraq, tədbirin sosial məsuliyyət baxımından önəmini qeyd edib. O, tədbirin çoxşaxəli mövzuya malik olduğunu və başda prof. G.Sadıxova olmaqla, Fransız dilinin leksikologiyası və üslubiyyatı kafedrasının tələbələrə göstərdikləri fəallığa görə təşəkkürünü bildirib.
Tədbirin sonunda kafedra müdiri, fil.f.d., prof. Gülnarə Sadıxova, dəyirmi masada narkomaniya mövzusunun müzakirəsinin əhəmiyyətini vurğulayaraq, təşkilatçılara və iştirakçılara mövzuya həssas yanaşdıqları üçün təşəkkürünü çatdırıb. O, tədbiri gənclərin cəmiyyətə ünvanladığı mesajlar və diqqətli mövqeləri kimi dəyərləndirib və tələbələrin bu təşəbbüsünün gələcəkdə layiqli vətəndaş yetişdirmək əzminin göstəricisi olduğunu bildirib.
Tədbir tələbələrin hazırladığı videoçarxların nümayişi ilə yekunlaşıb.