Azərbaycan Tələbə Gənclər Təşkilatları İttifaqının (ATGTİ) nümayəndə heyəti Azərbaycan Dillər Universitetində olub. ATGTİ-nin sədri Rəşad Zeynalov Tələbə Gənclər Təşkilatının davamlı və sistemli inkişafına verdiyi töhfələrə görə “Yenilikçi və İnkişaf Mükafatı”nı universitetin rektoru, akademik Kamal Abdullaya təqdim edib.
“Tehsil365” bildirir ki, görüşdə gənclərin inkişafı sahəsində həyata keçirilən fəaliyyətlər, mövcud əməkdaşlıq və gələcək birgə layihələr barədə fikir mübadiləsi aparılıb.
Akademik Kamal Abdulla gənclərin inkişafına yönəlmiş bütün təşəbbüsləri yüksək qiymətləndirdiyini qeyd edib. Rektor universitetdə tələbə təşkilatları və gənclər klublarının fəaliyyətinin daim dəstəkləndiyini, onların ideya və layihələrinin diqqətdə saxlanıldığını vurğulayıb. Bununla yanaşı, universitetin rektor 2023-2025-ci illər üzrə ADU Tələbə Gənclər Təşkilatına sədrlik etmiş Nicat Əliyevin fəaliyyətini yüksək qiymətləndirib.
ATGTİ-nin sədri Rəşad Zeynalov təşkilatın fəaliyyəti, həyata keçirdiyi layihələr, innovativ təşəbbüslər və gələcək planlar barədə məlumat təqdim edib. O, bu sahədə ADU ilə əməkdaşlığın daha da genişləndirilməsinin əhəmiyyətindən bəhs edib.
Sonda akademik Kamal Abdulla müəllifi olduğu “Seçmələrin Seçməsi – Qranulalar” adlı kitabını Rəşad Zeynalova hədiyyə edib.