“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən uğrunda qəhrəmancasına şəhid olmuş Ayaz İmanzadəyə həsr olunur. Buraxılış 24 noyabr saat 18:00-da yayımlanacaq. Proqramın aparıcısı Rəşidə Nəbizadə olacaq.
“Tehsil365” xəbər verir ki, 1996-cı il dekabrın 3-də Neftçala rayonunda dünyaya gələn Ayaz İmanzadə ilk təhsilini Aprel döyüşləri Milli Qəhrəmanı Samid İmanov adına 1 saylı məktəbdə alıb. 9-cu sinfi bitirdikdən sonra Türkiyədə hərbi məktəbə imtahanla qəbul olunsa da, ailəsinin razılığı olmadığından təhsilini Azərbaycanda davam etdirib və Cəmşid Naxçıvanski adına Hərbi Liseyə qəbul olunub.
2015-ci ildə anasını ağır xəstəlikdən itirməsinə baxmayaraq, Ayaz Vətənə xidmət arzusundan dönmür və üç ay sonra Heydər Əliyev adına Hərbi Akademiyaya qəbul olur. 2019-cu il iyunun 26-da Leytenant rütbəsi ilə məzun olaraq Ağcabədi rayonundakı hərbi hissəyə təyinat alır. Daha sonra xidmətini Füzuli rayonunda cəbhə xəttində davam etdirir.
Ayaz İmanzadə 2020-ci il aprelin 1-də qız övladı dünyaya gəldikdən sonra onu cəmi iki dəfə görə bilib. 27 sentyabrdan başlayan Vətən müharibəsində tağım komandiri kimi böyük şücaətlər göstərib, bir çox yaralı əsgəri xilas edib. O, ağır döyüş və susuzluq şəraitində 2 oktyabr 2020-ci ildə qəhrəmancasına şəhid olub. Şəhid Ayaz İmanzadə doğulduğu Neftçala rayonundakı Şəhidlər xiyabanında dəfn olunub.
Ayaz İmanzadənin ən böyük arzusu Vətən uğrunda şəhidlik zirvəsinə yüksəlmək idi və o, bu arzusuna qovuşdu.
Allah rəhmət eləsin!