Azərbaycan Dillər Universitetində "İsrail mədəniyyəti və incəsənəti həftəsi" tədbiri başa çatıb.
“Tehsil365” bildirir ki, tədbir həftəsi Beynəlxalq Münasibətlər və Regionşünaslıq fakültəsinin İsrailşünaslıq ixtisasının müəllimi Günay Feyziyevanın təşkilatçılığı ilə 469-cu qrup İsrailşünaslıq tələbələrinin iştirakı ilə keçirilib. Həmin günlərdə İsraildə kino və teatr, İsraildə arxitektura, İsraildə musiqi və İsraildə rəqs mövzularında seminarlar təşkil olunub.
17-21 noyabr tarixlərində tələbələr İsrail kino tarixi, onun əsas ideologiyaları və təsir edən amillər haqqında geniş təhlil aparıblar. İsrail mədəniyyətində xüsusi önəm daşıyan kino və teatrın inkişafına təsir göstərən Holokost hadisəsinə diqqət çəkilib.
Tədbirin moderatoru Tomris Rəhimli olub. Günay Seyid İsrailin kino və teatr tarixi haqqında təqdimatla çıxış edib, Humay Ağayeva isə yəhudi məsələsinin əks olunduğu kinoları video təqdimatla təhlil edib.
İsraildə arxitektura mövzusunda Günay Feyziyeva İsraildə səfər zamanı canlı müşahidə etdiyi arxitektura nümunələri haqqında təqdimat edib. Elgün Allahyarov isə Tel-Aviv və Yerusəlimin əsas memarlıq xüsusiyyətləri barədə məlumat verib.
İsraildə musiqi ilə bağlı Nuray İsmayılova məşhur musiqilərin tarixi və musiqi alətləri haqqında geniş təqdimatla çıxış etmişdir. Tələbələr “Şma Israel” mahnısını Şahverən Babayevlə birgə səsləndiriblər.
İsraildə rəqs mövzusunda Günəş Cahangirov təqdimatla çıxış edib və Azərbaycan rəqsləri ilə yəhudi rəqslərini müqayisə etmişdir. Sonda tələbələr "Hava Naqila" rəqsini ediblər. Tədbir sessiyalarının sonunda suala doğru cavab verən tələbələr kitab hədiyyəsi ilə mükafatlandırılıb.
Tədbirdə Beynəlxalq Münasibətlər kafedrasının müdiri Aida Yusifzadə, Qərb ölkələri üzrə Regionşünaslıq kafedrasının müdiri Sevdagül Əliyeva, kafedranın müəllimləri Mehparə Tajdehibonab, Şəfa Əbdürrəhimova, Mahnur Babayeva, Səbinə Muradova, Sevinc Qurbanova, Sara Ələsgərova, İsrail və Yaxın Şərq Araşdırmalar Mərkəzinin müdiri Emiliya Xudiyeva, mərkəzin mütəxəssisi Günay Səfərova, Şərq üzrə Regionşünaslıq kafedrasının müdiri Nigar Əfəndiyeva, müəllimləri Rəna Rəcəbli, Nailə Məmmədova, Fidan Ələsgərova, Təranə Quluzadə, Rəşad Babayev, Şəfəq Mustafayeva, Aytən Hüseynova və İsrailşünaslıq ixtisası üzrə təhsil alan tələbələr iştirak ediblər.
Tədbir uğurla başa çatmış və tələbələrin İsrail mədəniyyəti və incəsənəti sahəsində biliklərinin artırılmasına mühüm töhfə verib.