Bu gün – 23 noyabr, Azərbaycan ədəbiyyatının görkəmli nümayəndələrindən biri, yazıçı-dramaturq, şair, tərcüməçi və pedaqoq Aqşin Əlisəttar oğlu Babayevin doğum günüdür.
"Tehsil365" xəbər verir ki, 1936-cı ildə Bakıda dünyaya gəlmiş Aqşin Babayev zəngin və çoxşaxəli yaradıcılığı ilə ədəbiyyatımızda dərin iz qoymuşdur.
Filologiya elmləri doktoru, professor, əməkdar jurnalist və II dərəcəli dövlət müşaviri olan Aqşin Babayev uzun illər Azərbaycan Dövlət Mədəniyyət və İncəsənət Universitetində "Ədəbi yaradıcılıq və ekran dramaturgiyası" kafedrasına rəhbərlik etmiş, yüzlərlə tələbənin yetişməsində əvəzsiz rol oynamışdır.
Ədəbi yaradıcılığında milli dəyərləri, mənəvi problemləri və insan psixologiyasını ustalıqla işləmiş, eyni zamanda bir sıra dünya ədəbiyyatı nümunələrini Azərbaycan dilinə tərcümə edərək ədəbi-mədəni körpülər yaratmışdır.
Aqşin Babayevin doğum günü həm də onun zəngin irsini və xidmətlərini bir daha xatırlamaq, yeni nəsillərə tanıtmaq üçün dəyərli fürsətdir. O, 2020-ci ildə vəfat etsə də, yazdıqları ilə yaşayır və Azərbaycan mədəniyyətinə verdiyi töhfələrlə yaddaşlarda qalır.