Bu gün, 23 noyabr, yazıçı-filosof, həkim-kardioloq Rafiq Tağının vəfatının ildönümüdür.
"Tehsil365" xəbər verir ki,
1950-ci ildə Masallı rayonunun Xoşçobanlı kəndində dünyaya gəlmiş Rafiq Tağı (Tağıyev Rafiq Nəzir oğlu) Azərbaycan ədəbiyyatında sərt, cəsarətli və orijinal çıxışları ilə tanınırdı.
Peşəkar fəaliyyəti həkimliklə bağlı olsa da, o, yaradıcılığında daha çox publisistikaya və fəlsəfi düşüncəyə üstünlük verirdi. Onun yazıları ictimai və dini məsələlərə sərt, bəzən mübahisəli münasibəti ilə seçilirdi. Bu yanaşmalar bəzən cəmiyyətin müxtəlif təbəqələri tərəfindən mübahisələrə səbəb olsa da, Rafiq Tağı fikirlərini ifadə etməkdən çəkinmirdi.
Rafiq Tağı 2011-ci ilin 19 noyabrında Bakı şəhərində naməlum şəxs tərəfindən bıçaqlanaraq ağır yaralanmış, 23 noyabrda isə xəstəxanada vəfat etmişdir. Onun ölümü ölkə və beynəlxalq səviyyədə böyük rezonansa səbəb olmuş, ifadə azadlığı və təhlükəsizlik məsələləri ilə bağlı ciddi suallar yaratmışdır.
Rafiq Tağı öz fikirlərinə görə can verən nadir yazıçılardan biri kimi Azərbaycan ziyalı mühitində xüsusi yer tutur. Bugünkü ildönümü onun cəsarətini, düşüncə azadlığına verdiyi dəyəri və ədəbi irsini yenidən xatırlamaq üçün bir fürsətdir.