Noyabrın 21-də Azərbaycan Dövlət Pedaqoji Universitetində (ADPU) Elmi şuranın növbəti iclası keçirilib.
‘‘Tehsil365’’ bildirir ki, ADPU-da bildirilib ki, universitetin rektoru professor Cəfər Cəfərov tədris və elmi fəaliyyət sahəsində aparılan yeniliklər, eləcə də beynəlxalq əməkdaşlığın genişləndirilməsi istiqamətində həyata keçirilən addımlar barədə söz açıb. Rektor həm professor-müəllim heyətinin, həm də tələbələrin respublika və dünya səviyyəsində qazandıqları uğurları xüsusi vurğulayaraq, bu nailiyyətlərin ADPU-nun elmi və tədris mühitində nüfuzunu artırdığını bildirib. O, həmçinin növbəti günlərdə universitetin tərəfdaşlığı və ev sahibliyi ilə həyata keçiriləcək konfrans və tədbirlərə hazırlıq prosesi barədə məlumat verilib.
Tədris işləri üzrə prorektor dosent Eldar Aslanov 2025-ci ildə universitetdə tələbə, məzun, professor-müəllim və inzibati heyət arasında həyata keçirilmiş sorğularının nəticələrinə dair geniş təqdimatla çıxış edib. Qeyd olunub ki, cari ildə sorğularda iştirak göstəricilərində əvvəlki illə müqayisədə ciddi artım müşahidə olunub. Tədrisin keyfiyyəti ilə bağlı tələbələr arasında keçirilən məmnuniyyət sorğusunda iştirak edən 5137 tələbədən 81 faizi müəllimlərin fənni tədris etmə bacarığından tamamilə razıdır. Respondentlərin 73 faizi tədris proqramlarının təhsil sahəsində zəruri olan xüsusi bilik və bacarıqlarla tam uyğunlaşdığını, 70.2 faizi müəllimlər fənni daha yaxşı mənimsətmək üçün doğru və effektiv metodlardan istifadə etdiyini düşünür. Tələbələrin böyük əksəriyyəti kitabxana və yeməkxananın fəaliyyətindən, İKT və auditoriyalar üzrə infrastrkturdan razıdır. Təqdimatda, həmçinin respondentlərin açıq suallara verdiyi 9000-dən çox rəyin analizi təqdim olunub.
İclasda elm və innovasiyalar üzrə prorektor professor Asəf Zamanov, Tədris departamentinin direktoru dosent Sənan Əliyev, Keyfiyyətin təminatı şöbəsinin müdiri dosent Qalib Şərifov, rektorun müşaviri Ümid Mehdiyev və Elmi katib Nərminə Abdullayeva cari məsələlərlə bağlı təklifləri təqdim ediblər. Dissertasiya mövzularının təsdiqi, doktorantların status dəyişiklikləri, Elmi-metodiki şuranın yeni tərkibinin müəyyənləşdirilməsi, 2026-2027-ci tədris ili üçün tələbə qəbulu proqnoz planının təsdiqi, dərs vəsaitlərinin nəşrinə icazə verilməsi, monitorinq sənədlərinin təsdiqi və digər məsələlər müzakirəyə çıxarılıb.
Sonda təklif edilən məsələlər səsə qoyularaq qəbul edilib.